ata-e-raegan

mire siine ko apnī jagmagātī uñgliyoñ se chīrne vaale

tū mujh par mere aane vaale din ko be-jihat kar de

ki maiñ ne jis qadar jaanā hai

itne dukh uThā.e haiñ

mire andar mire saare safar kā

be-navā be-kār-pan

ātish-fishāñ laave kī sūrat saañs letā hai

ki jaise band johaḌ ke khaḌe paanī meñ kiiḌe kulbulāte haiñ

ta.affun anginat lafzoñ kī lāshoñ par bichhe

kaale kafan kā mātamī lamha

maiñ tere ilm kī baḳhshī huī majbūriyoñ ke habs meñ

apnī karāheñ nazm kartā huuñ

na jiitā huuñ na martā huuñ

mire siine ko aa kar khol

apnā ilm apnā nuur mujh se chhīn le

lekin mujhe phir se mirī hairāniyāñ de de

mere sine ko apni jagmagati ungliyon se chirne wale

tu mujh par mere aane wale din ko be-jihat kar de

ki main ne jis qadar jaana hai

itne dukh uThae hain

mere andar mere sare safar ka

be-nawa be-kar-pan

aatish-fishan lawe ki surat sans leta hai

ki jaise band johaD ke khaDe pani mein kiDe kulbulate hain

taffun anginat lafzon ki lashon par bichhe

kale kafan ka matami lamha

main tere ilm ki baKHshi hui majburiyon ke habs mein

apni karahen nazm karta hun

na jita hun na marta hun

mere sine ko aa kar khol

apna ilm apna nur mujh se chhin le

lekin mujhe phir se meri hairaniyan de de