aurat KHuda ka aKHbar hai

aaj se sirf kuchh saal pahle kī ye baat hai

āsmān jab zamīñ par nahīñ thā

ḳhudā ek aḳhbār thā aur aḳhbār meñ

totlī ainakoñ ke bure shahr kā zikr thā

aur maiñ ne kahā thā

agar merī nāpāk āñkhoñ kī almāriyoñ meñ kabhī

duudh kā jaam dekho to āvāz denā

chalā ā.ūñgā

maiñ ḳhatarnāk chehroñ kā dushman nahīñ huuñ

aaj kī raat aurat hai jis ne mujhe apnā beTā kahā hai

alganī par paḌe saare kapḌoñ par ik dhuup sī jam ga.ī hai

aur sabhī kaale bistar se lipTī huī titliyāñ uḌ ga.ī haiñ

aaj kī raat aurat hai

jis ke badan meñ mirā darmiyāna badan

Doltā hai havāoñ kī sangat liye

aaj kī raat

hañste hue kyuuñ na pakḌeñ ḳhudā ko

ḳhudā ek aḳhbār

jis meñ sabhī totlī ainakoñ ke

bure shahr kā zikr thā par vo aurat

jo ik shahr se kam nahīñ hai

mujhe apne siine kī bhārī chaTānoñ se Takrā ke

har ek se kah rahī hai

agar merī nāpāk āñkhoñ kī almāriyoñ meñ kabhī

duudh kā jaam dekho to āvāz denā

chalī ā.ūñgī

maiñ ḳhatarnāk chehroñ kī dushman nahīñ huuñ

aaj se sirf kuchh sal pahle ki ye baat hai

aasman jab zamin par nahin tha

KHuda ek aKHbar tha aur aKHbar mein

totli ainakon ke bure shahr ka zikr tha

aur main ne kaha tha

agar meri napak aankhon ki almariyon mein kabhi

dudh ka jam dekho to aawaz dena

chala aaunga

main KHatarnak chehron ka dushman nahin hun

aaj ki raat aurat hai jis ne mujhe apna beTa kaha hai

algani par paDe sare kapDon par ek dhup si jam gai hai

aur sabhi kale bistar se lipTi hui titliyan uD gai hain

aaj ki raat aurat hai

jis ke badan mein mera darmiyana badan

Dolta hai hawaon ki sangat liye

aaj ki raat

hanste hue kyun na pakDen KHuda ko

KHuda ek aKHbar

jis mein sabhi totli ainakon ke

bure shahr ka zikr tha par wo aurat

jo ek shahr se kam nahin hai

mujhe apne sine ki bhaari chaTanon se Takra ke

har ek se kah rahi hai

agar meri napak aankhon ki almariyon mein kabhi

dudh ka jam dekho to aawaz dena

chali aaungi

main KHatarnak chehron ki dushman nahin hun