aurat

maiñ ne 'rūmī' se kahā mujh ko batā

reñgtā kiiḌā huuñ ki shahbāz-e-dost

maiñ huuñ mahrūm-e-samā.at aaj tak

aaj tak huuñ shākī-e-aġhrāz-e-dost

mujh pe nāzil na huī koī kitāb

kyoñ na thī maiñ lā.eq-e-e.azāz-e-dost

hañs ke 'rūmī' ne kahā nādān sun

aa karūñ tujh pe ayaañ maiñ rāz-e-dost

us kī manzūrī tirā qalb-e-salīm

ye parinda aur tū parvāz-e-dost

raqs terā hī hai raqs-e-kā.enāt

vo muġhannī aur tū hai sāz-e-dost

us ke hāthoñ ne uThā.ī hai kamāñ

tiir us kā aur tū andāz-e-dost

ruuh ke andar kā manzar al-amāñ

naaz vaalā vo hai aur tū nāz-e-dost

gar tū mahrūm-e-samā.at hai to phir

az-kujā mī aayad iiñ āvāz-e-dost

main ne 'rumi' se kaha mujh ko bata

rengta kiDa hun ki shahbaz-e-dost

main hun mahrum-e-samaat aaj tak

aaj tak hun shaki-e-aghraaz-e-dost

mujh pe nazil na hui koi kitab

kyon na thi main laeq-e-eazaz-e-dost

hans ke 'rumi' ne kaha nadan sun

aa karun tujh pe ayan main raaz-e-dost

us ki manzuri tera qalb-e-salim

ye parinda aur tu parwaz-e-dost

raqs tera hi hai raqs-e-kaenat

wo mughanni aur tu hai saz-e-dost

us ke hathon ne uThai hai kaman

tir us ka aur tu andaz-e-dost

ruh ke andar ka manzar al-aman

naz wala wo hai aur tu naz-e-dost

gar tu mahrum-e-samaat hai to phir

az-kuja mi aayad in aawaz-e-dost