ba-yaad-e-jigar

har taraf thī tirī pukār jigar

har jagah thā tū naġhma-bār jigar

umr bhar to tujhe qarār na thā

āḳhirash aa gayā qarār jigar

suunī suunī sī hai har ik mahfil

ujḌī ujḌī sī hai bahār jigar

jab mohabbat kā zikr aa.egā

aa.egā yaad bār-bār jigar

rashk karte the phuul gulshan meñ

tujh ko kāñToñ se thā vo pyaar jigar

shā.erī tujh pe naaz kartī thī

aur tū us pe thā nisār jigar

be-ḳhudī tujh ko zeb detī thī

thā ḳhudī kā tū rāzdār jigar

har adā terī ehtirām-talab

har ġhazal terī shāhkār jigar

tujh se sher-o-adab kī azmat thī

har jagah tū thā bā-vaqār jigar

shaġhl-e-mai bhī tirā misālī thā

azm-e-tauba bhī yādgār jigar

kis ko rote haiñ jām-o-paimāna

allah allah tirā vaqār jigar

allah allāh terī haq-goī

tujh pe rahmat hazār baar jigar

tere dil meñ thā vo ġham-e-insāñ

jis kī har samt hai pukār jigar

har dukhī dil kī tarjumānī kī

thā sabhī kā tū ġham-gusār jigar

nasl-o-qaum-o-vatan ke hangāme

the bahut tujh ko nāgavār jigar

tere paiġhām tak na pahuñche jo

vo siyāsat hai ḳhām-kār jigar

chhū ga.e the jinheñ qadam tere

rāste haiñ vo yādgār jigar

sho.ala-e-tūr ātish-e-gul haiñ

laakh firdaus darkinār jigar

allah allah vo azm-e-haj terā

rahmat-e-haq se ham-kanār jigar

aur vo na.at-e-pur-ḳhulūs tirī

vo tirī ruuh kī pukār 'jigar'

sharm-e-isyāñ dil-e-tapīda par

vo bharosa vo inhisār jigar

vo latāfat ki dīda-o-dil kā

gosha gosha hai pur-bahār jigar

vo jagah bhī hai pyaar ke qābil

jis jagah hai tirā mazār jigar

bhuul saktā nahīñ tujhe koī

yuuñ to shā.ir haiñ be-shumār jigar

har taraf thi teri pukar jigar

har jagah tha tu naghma-bar jigar

umr bhar to tujhe qarar na tha

aaKHirash aa gaya qarar jigar

suni suni si hai har ek mahfil

ujDi ujDi si hai bahaar jigar

jab mohabbat ka zikr aaega

aaega yaad bar-bar jigar

rashk karte the phul gulshan mein

tujh ko kanTon se tha wo pyar jigar

shaeri tujh pe naz karti thi

aur tu us pe tha nisar jigar

be-KHudi tujh ko zeb deti thi

tha KHudi ka tu raazdar jigar

har ada teri ehtiram-talab

har ghazal teri shahkar jigar

tujh se sher-o-adab ki azmat thi

har jagah tu tha ba-waqar jigar

shaghl-e-mai bhi tera misali tha

azm-e-tauba bhi yaadgar jigar

kis ko rote hain jam-o-paimana

allah allah tera waqar jigar

allah allah teri haq-goi

tujh pe rahmat hazar bar jigar

tere dil mein tha wo gham-e-insan

jis ki har samt hai pukar jigar

har dukhi dil ki tarjumani ki

tha sabhi ka tu gham-gusar jigar

nasl-o-qaum-o-watan ke hangame

the bahut tujh ko nagawar jigar

tere paigham tak na pahunche jo

wo siyasat hai KHam-kar jigar

chhu gae the jinhen qadam tere

raste hain wo yaadgar jigar

shoala-e-tur aatish-e-gul hain

lakh firdaus darkinar jigar

allah allah wo azm-e-haj tera

rahmat-e-haq se ham-kanar jigar

aur wo nat-e-pur-KHulus teri

wo teri ruh ki pukar 'jigar'

sharm-e-isyan dil-e-tapida par

wo bharosa wo inhisar jigar

wo latafat ki dida-o-dil ka

gosha gosha hai pur-bahaar jigar

wo jagah bhi hai pyar ke qabil

jis jagah hai tera mazar jigar

bhul sakta nahin tujhe koi

yun to shair hain be-shumar jigar