baada-e-nim-ras

kis qayāmat kā tabassum hai tire hoñToñ par

isti.āroñ meñ bhaTakte haiñ ḳhayālāt mire

maiñ ki har saañs ko ik sher banā saktā huuñ

nazm hone ko pareshān haiñ jazbāt mire

aañkh jamtī nahīñ lahrāte hue qadmoñ par

kisī naġhme kā talātum hai ki raftār tirī

raqs añgḌā.iyāñ letā hai tirī bāñhoñ meñ

hairat-āsār hai kyuuñ chashm-e-fusūñ-bār tirī

be-ḳhayālī meñ nasheboñ se guzarne vaalī

farsh hamvār se uljheñge qadam rah rah kar

lab thirak jā.eñge alfāz kī mausīqī par

apnī raftār se uljheñge qadam rah rah kar

dekhte dekhte bharpūr javānī kī hayā

terī bebāk nigāhoñ meñ samā jā.egī

parda-e-chashm se nikleñgī jhijak kar nazreñ

zulf Dartī huī ruḳhsār pe lahrā.egī

jism har gaam pe laġhzish kā ishāra pā kar

jām-e-labrez kī mānind chhalak jā.egā

reshmī reshmī zulfoñ se phisaltā āñchal

kabhī shānoñ se kabhī sar se Dhalak jā.egā

kis qayamat ka tabassum hai tere honTon par

istiaron mein bhaTakte hain KHayalat mere

main ki har sans ko ek sher bana sakta hun

nazm hone ko pareshan hain jazbaat mere

aankh jamti nahin lahraate hue qadmon par

kisi naghme ka talatum hai ki raftar teri

raqs angDaiyan leta hai teri banhon mein

hairat-asar hai kyun chashm-e-fusun-bar teri

be-KHayali mein nashebon se guzarne wali

farsh hamwar se uljhenge qadam rah rah kar

lab thirak jaenge alfaz ki mausiqi par

apni raftar se uljhenge qadam rah rah kar

dekhte dekhte bharpur jawani ki haya

teri bebak nigahon mein sama jaegi

parda-e-chashm se niklengi jhijak kar nazren

zulf Darti hui ruKHsar pe lahraegi

jism har gam pe laghzish ka ishaara pa kar

jam-e-labrez ki manind chhalak jaega

reshmi reshmi zulfon se phisalta aanchal

kabhi shanon se kabhi sar se Dhalak jaega