baadal

bas-ki duniyā pe musībat kī ghaTā chhā.ī thī

ahl-e-ālam kī ġharaz jaan pe ban aa.ī thī

dil meñ bādal ke ḳhudā jaane ki kyā aa.ī thī

buuñd paanī kī na kambaḳht ne barsā.ī thī

yuuñ to bādal ka.ī ghir ghir ke chale aate the

va.ade karte the magar va.adoñ se phir jaate the

bas-ki majbūr the vo ādat-e-ḳhud-ġharzī se

taur un ke jo barasne ke the sab farzī the

shor ko apne jo vo sarf-e-havā karte the

bahr-e-aflāk meñ tūfān bapā karte the

maiñ ne ye kah hī diyā aap ke sab hiile haiñ

garjne vaale mire dosto kab barse haiñ

bādal allah ne banā.e the baras jaane ko

kisī dahqān kī qismat pe taras khāne ko

dil unheñ maiñ ne barasne se churāte dekhā

ek aañsū na nigāhoñ se bahāte dekhā

bhuul jaate haiñ jo sach pūchho to zar vaale bhī

ki makānoñ ke huā karte haiñ parnāle bhī

dekhte dekhte bādal sabhī barbād hue

hausle vaale vahīñ aan ke ābād hue

ashk dahqāñ kī musībat pe bahāne aa.e

muñh meñ khetī ke vahīñ paanī churāne aa.e

sāġhar-e-dil meñ mai-e-dard bharī rakhte the

aur rahmat kī lagā.e vo jhaḌī rakhte the

phir to vīrānoñ ko gulzār banā kar chhoḌā

beḌā duniyā kā ġharaz paar karā kar chhoḌā

abr-e-bārāñ ne jo yuuñ apnī dikhā.ī himmat

shāmil-e-hāl huī hai ke ḳhudā kī rahmat

apnī rahmat meñ ḳhudā ne unheñ ābād kiyā

apne siine se lagā kar unheñ dil-shād kiyā

zinda rahte haiñ 'purī' mard saḳhāvat vaale

yaad rah jaate haiñ duniyā meñ muravvat vaale

bas-ki duniya pe musibat ki ghaTa chhai thi

ahl-e-alam ki gharaz jaan pe ban aai thi

dil mein baadal ke KHuda jaane ki kya aai thi

bund pani ki na kambaKHt ne barsai thi

yun to baadal kai ghir ghir ke chale aate the

wade karte the magar wadon se phir jate the

bas-ki majbur the wo aadat-e-KHud-gharzi se

taur un ke jo barasne ke the sab farzi the

shor ko apne jo wo sarf-e-hawa karte the

bahr-e-aflak mein tufan bapa karte the

main ne ye kah hi diya aap ke sab hile hain

garjne wale mere dosto kab barse hain

baadal allah ne banae the baras jaane ko

kisi dahqan ki qismat pe taras khane ko

dil unhen main ne barasne se churaate dekha

ek aansu na nigahon se bahate dekha

bhul jate hain jo sach puchho to zar wale bhi

ki makanon ke hua karte hain parnale bhi

dekhte dekhte baadal sabhi barbaad hue

hausle wale wahin aan ke aabaad hue

ashk dahqan ki musibat pe bahane aae

munh mein kheti ke wahin pani churane aae

saghar-e-dil mein mai-e-dard bhari rakhte the

aur rahmat ki lagae wo jhaDi rakhte the

phir to viranon ko gulzar bana kar chhoDa

beDa duniya ka gharaz par kara kar chhoDa

abr-e-baran ne jo yun apni dikhai himmat

shamil-e-haal hui hai ke KHuda ki rahmat

apni rahmat mein KHuda ne unhen aabaad kiya

apne sine se laga kar unhen dil-shad kiya

zinda rahte hain 'puri' mard saKHawat wale

yaad rah jate hain duniya mein murawwat wale