barish

aa ga.ī ThanDī havā barsāt kī

chhā ga.ī kaalī ghaTā barsāt kī

ab kahāñ sūraj kī garmī kā vo josh

chhup gayā bādal kā sunte hī ḳharosh

dal ke dal bādal umañD kar aa ga.e

aur saare āsmāñ par chhā ga.e

abr ke saa.e meñ hai saarī zamīñ

dūsre saa.e kī ab hājat nahīñ

ho ga.e aise meñ sab jāñ-dār ḳhush

lahlahātā sabza ḳhush ashjār ḳhush

sun ke bārish kī masarrat kā payām

jhūmte mastī meñ haiñ paude tamām

sab parinde chahchahāte phirte haiñ

hai ḳhushī itnī ki gaate phirte haiñ

ai lo vo garjā vo aa.iiñ būñdiyāñ

diid ke qābil hai ye pyārā samāñ

ḳhūbsūrat kis qadar hai ye phuvār

motiyoñ ke haar meñ qatroñ ke taar

meñh barasne kī jo aatī hai sadā

is se ho jaatā hai paidā giit sā

lo vo chhīñTe zor se aane lage

paanī par naale bhī barsāne lage

vo garaj bādal kī vo bārish kā zor

shahr kī galiyoñ meñ vo bachchoñ kā shor

be-tahāshā dauḌte phirte haiñ ye

uTh khaḌe hote haiñ jab girte haiñ ye

naav kāġhaz kī banātā hai koī

giit sāvan ke sunātā hai koī

jab phisal jaatā hai koī rāhgīr

pīTte haiñ tāliyāñ ban kar sharīr

vo galī kūchoñ se paanī bah chalā

ye kahāñ pahuñchegā batlāo bhalā

ye Thahar saktā nahīñ hai shahr meñ

shahr se jā kar giregā nahr meñ

jā giregī nahr dariyā meñ kahīñ

bastiyoñ se duur sahrā meñ kahīñ

saath ye sarmāya sab dariyā liye

jā.egā rasta samundar kā liye

tai safar kartā huā lail-o-nahār

bahr meñ mil jā.egā anjām-e-kār

aa gai ThanDi hawa barsat ki

chha gai kali ghaTa barsat ki

ab kahan suraj ki garmi ka wo josh

chhup gaya baadal ka sunte hi KHarosh

dal ke dal baadal umanD kar aa gae

aur sare aasman par chha gae

abr ke sae mein hai sari zamin

dusre sae ki ab hajat nahin

ho gae aise mein sab jaan-dar KHush

lahlahata sabza KHush ashjar KHush

sun ke barish ki masarrat ka payam

jhumte masti mein hain paude tamam

sab parinde chahchahate phirte hain

hai KHushi itni ki gate phirte hain

ai lo wo garja wo aain bundiyan

did ke qabil hai ye pyara saman

KHubsurat kis qadar hai ye phuwar

motiyon ke haar mein qatron ke tar

meinh barasne ki jo aati hai sada

is se ho jata hai paida git sa

lo wo chhinTe zor se aane lage

pani par nale bhi barsane lage

wo garaj baadal ki wo barish ka zor

shahr ki galiyon mein wo bachchon ka shor

be-tahasha dauDte phirte hain ye

uTh khaDe hote hain jab girte hain ye

naw kaghaz ki banata hai koi

git sawan ke sunata hai koi

jab phisal jata hai koi rahgir

piTte hain taliyan ban kar sharir

wo gali kuchon se pani bah chala

ye kahan pahunchega batlao bhala

ye Thahar sakta nahin hai shahr mein

shahr se ja kar girega nahr mein

ja giregi nahr dariya mein kahin

bastiyon se dur sahra mein kahin

sath ye sarmaya sab dariya liye

jaega rasta samundar ka liye

tai safar karta hua lail-o-nahaar

bahr mein mil jaega anjam-e-kar