bazar

bol ai shā.ir ai naġhma-gar

bechegā fan ko bechegā

bol apne man ko bechegā

apne shah-pāre bechegā apnī tahrīreñ bechegā

ye apnī barahna-guftārī ye shola-bayānī bechegā

ya.anī jo tire lafzoñ meñ hai ḳhanjar kī ravānī bechegā

Dhaltā hai jo tere ḳhvāboñ meñ vo rang-e-bahārāñ bechegā

paltā hai jo tere siine meñ vo ḳhūnīñ tūfāñ bechegā

jo parda-e-mustaqbil meñ haiñ kyā vo tanvīreñ bechegā

jin insānoñ ko jagātā hai un kī taqdīreñ bechegā

fan kī tāsīr ko bechegā

bechegā zamīr ko bechegā

bol ai shā.ir ai naġhma-gar

bechegā

ham nukta-dān-e-fikr-o-nazar

ham qadr-shanās-e-ilm-o-hunar

terī ḳhidmat kā sila deñge terī mehnat kā samar deñge

jīvan kī rātoñ meñ zar-kār ujālā kar deñge

chāñdī ke khanakte sikkoñ se ham terī jebeñ bhar deñge

bol ai shā.ir kyā kahtā hai

tū kis duniyā meñ rahtā hai

ai naġhma-gar

in sūkhe hāthoñ se fan kā aivān sajā.egā kyūñkar

fāqoñ ke añdhere meñ rah kar shah-kār banā.egā kyūñkar

iflās ke aalam meñ kyūñ-kar tū rangīñ ġhazleñ likkhegā

roTī ko tarastā rahtā hai kyā khā kar nazmeñ likhegā

jiinā ho jo is duniyā meñ to phir bāzār meñ aa dūkān lagā

kuchh dām-o-diram kī bāteñ kar bikne vaalā sāmān sajā

haañ bech de apnī jur.at ko aa jā.egī chehre par surḳhī

haañ bech qalam kī tāqat ko varna ye tujhe le Dūbegī

is ek qalam kā zikr hī kyā insān ḳharīde haiñ ham ne

maz.hab ke daam chukā.e haiñ īmān ḳharīde haiñ ham ne

har shai nīlām pe chaḌhtī hai vo dhartī ho yā auj-e-falak

har chiiz yahāñ bik jaatī hai miTTī se le kar mulk talak

lā tū bhī apnā maal dikhā dekheñ tire palle meñ kyā hai

kuchh ḳhuddārī kuchh bebākī kuchh haq-goī ḳhair achchhā hai

jaldī se ye sab kuchh bech bhī de daam in kā girne vaalā hai

phir koī na in ko pūchhegā

hai vaqt abhī kar ke saudā bech aune-paune ye kuuḌā

mauqa hai yahī raushan kar le mustaqbil apne bachchoñ kā

ai ahmaq insāñ hosh meñ aa kuchh aql-o-ḳhirad kī bāteñ kar

be-faiz na apnī mehnat kar be-kār na apnī rāteñ kar

kuchh dhokā de kuchh ghāteñ kar

ai naġhma-gar

bechegā

bechegā ḳhud ko bechegā

ham tere ḳharīdār aa.e haiñ

bol apnī qīmat kyā legā

bol ai shair ai naghma-gar

bechega fan ko bechega

bol apne man ko bechega

apne shah-pare bechega apni tahriren bechega

ye apni barahna-guftari ye shola-bayani bechega

yani jo tere lafzon mein hai KHanjar ki rawani bechega

Dhalta hai jo tere KHwabon mein wo rang-e-bahaaran bechega

palta hai jo tere sine mein wo KHunin tufan bechega

jo parda-e-mustaqbil mein hain kya wo tanwiren bechega

jin insanon ko jagata hai un ki taqdiren bechega

fan ki tasir ko bechega

bechega zamir ko bechega

bol ai shair ai naghma-gar

bechega

hum nukta-dan-e-fikr-o-nazar

hum qadr-shanas-e-ilm-o-hunar

teri KHidmat ka sila denge teri mehnat ka samar denge

jiwan ki raaton mein zar-kar ujala kar denge

chandi ke khanakte sikkon se hum teri jeben bhar denge

bol ai shair kya kahta hai

tu kis duniya mein rahta hai

ai naghma-gar

in sukhe hathon se fan ka aiwan sajaega kyunkar

faqon ke andhere mein rah kar shah-kar banaega kyunkar

iflas ke aalam mein kyun-kar tu rangin ghazlen likkhega

roTi ko tarasta rahta hai kya kha kar nazmen likhega

jina ho jo is duniya mein to phir bazar mein aa dukan laga

kuchh dam-o-diram ki baaten kar bikne wala saman saja

han bech de apni jurat ko aa jaegi chehre par surKHi

han bech qalam ki taqat ko warna ye tujhe le Dubegi

is ek qalam ka zikr hi kya insan KHaride hain hum ne

mazhab ke dam chukae hain iman KHaride hain hum ne

har shai nilam pe chaDhti hai wo dharti ho ya auj-e-falak

har chiz yahan bik jati hai miTTi se le kar mulk talak

la tu bhi apna mal dikha dekhen tere palle mein kya hai

kuchh KHuddari kuchh bebaki kuchh haq-goi KHair achchha hai

jaldi se ye sab kuchh bech bhi de dam in ka girne wala hai

phir koi na in ko puchhega

hai waqt abhi kar ke sauda bech aune-paune ye kuDa

mauqa hai yahi raushan kar le mustaqbil apne bachchon ka

ai ahmaq insan hosh mein aa kuchh aql-o-KHirad ki baaten kar

be-faiz na apni mehnat kar be-kar na apni raaten kar

kuchh dhoka de kuchh ghaten kar

ai naghma-gar

bechega

bechega KHud ko bechega

hum tere KHaridar aae hain

bol apni qimat kya lega