bachpan

bachpan ke dukh kitne achchhe hote the

tab to sirf khilaune TuuTā karte the

vo ḳhushiyāñ bhī jaane kaisī ḳhushiyāñ thiiñ

titlī ke par noch ke nāchā karte the

paañv maar ke ḳhud bārish ke paanī meñ

apnī naav aap Duboyā karte the

chhoTe the to makr-o-fareb bhī chhoTe the

daana Daal ke chiḌiyā pakḌā karte the

apne jal jaane kā bhī ehsās na thā

bhaḌke hue sho.aloñ ko chheḌā karte the

aaj bhī un kī yādeñ niiñd uḌātī haiñ

bachpan meñ jo ham ne sapne dekhe the

ab to ek aañsū rusvā kar jaatā hai

bachpan meñ jī bhar ke royā karte the

bachpan ke dukh kitne achchhe hote the

tab to sirf khilaune TuTa karte the

wo KHushiyan bhi jaane kaisi KHushiyan thin

titli ke par noch ke nacha karte the

panw mar ke KHud barish ke pani mein

apni naw aap Duboya karte the

chhoTe the to makr-o-fareb bhi chhoTe the

dana Dal ke chiDiya pakDa karte the

apne jal jaane ka bhi ehsas na tha

bhaDke hue shoalon ko chheDa karte the

aaj bhi un ki yaaden nind uDati hain

bachpan mein jo hum ne sapne dekhe the

ab to ek aansu ruswa kar jata hai

bachpan mein ji bhar ke roya karte the