bachpane ki yaad

ai bachpane kī duniyā to yaad aa rahī hai

dil se mirī sadā-e-fariyād aa rahī hai

rāhat sunā rahī thī afsāna saltanat kā

thī maañ kī god mujh ko kāshāna saltanat kā

vo ghar ki duur jis se thī gardish-e-zamāna

āzādiyoñ kā merī ābād āshiyāna

phirtī hai ab nazar meñ tasvīr us makāñ kī

arsh-e-barīñ se behtar thī sarzamīñ jahāñ kī

nāzuk-mizāj ban kar vo rūThnā machalnā

sehn-e-makāñ meñ din bhar vo kūdnā-uchhalnā

allāh-re vo taḳhayyul allāh-re sāz-o-sāmāñ

duniyā kī saltanat thī is zindagī pe qurbāñ

us ahd-e-āfyat meñ ik baar phir sulā de

ai mere ahd-e-māzī phir ik jhalak dikhā de

bāġh-e-jahāñ meñ rakkhā un shādiyoñ ne mujh ko

rāhat kī loriyāñ diiñ āzādiyoñ ne mujh ko

be-fikr zindagī thī ḳhud hosh mujh ko kab thā

ik kaif-e-be-ḳhudī thā mast-e-mai-e-tarab thā

ai umr-e-rafta tū ne kī mujh se be-valfāī

aa jā palaT ke dam bhar maiñ huuñ tirā fidā.ī

dil meñ sharārteñ thiiñ kaise ġhazab kī pinhāñ

rag rag meñ bijliyāñ thiiñ josh-e-tarab kī pinhāñ

huuñ apnī zindagī kā andāza karne vaalā

jannat se lā ke tū ne dozaḳh meñ mujh ko Daalā

ai bachpane ki duniya to yaad aa rahi hai

dil se meri sada-e-fariyaad aa rahi hai

rahat suna rahi thi afsana saltanat ka

thi man ki god mujh ko kashana saltanat ka

wo ghar ki dur jis se thi gardish-e-zamana

aazadiyon ka meri aabaad aashiyana

phirti hai ab nazar mein taswir us makan ki

arsh-e-barin se behtar thi sarzamin jahan ki

nazuk-mizaj ban kar wo ruThna machalna

sehn-e-makan mein din bhar wo kudna-uchhalna

allah-re wo taKHayyul allah-re saz-o-saman

duniya ki saltanat thi is zindagi pe qurban

us ahd-e-afyat mein ek bar phir sula de

ai mere ahd-e-mazi phir ek jhalak dikha de

bagh-e-jahan mein rakkha un shadiyon ne mujh ko

rahat ki loriyan din aazadiyon ne mujh ko

be-fikr zindagi thi KHud hosh mujh ko kab tha

ek kaif-e-be-KHudi tha mast-e-mai-e-tarab tha

ai umr-e-rafta tu ne ki mujh se be-walfai

aa ja palaT ke dam bhar main hun tera fidai

dil mein shararten thin kaise ghazab ki pinhan

rag rag mein bijliyan thin josh-e-tarab ki pinhan

hun apni zindagi ka andaza karne wala

jannat se la ke tu ne dozaKH mein mujh ko Dala