bad-guman

tumhāre gale meñ

na.e ḳhvāb ke motiyoñ kī sunahrī sī maalā

hamārī nahīñ hai

samundar vo jis par

tumhāre qadam kashtiyāñ hoñ

hameñ sirf dars-e-fanā hai

hamāre liye to

kisī ajnabī sī sadā ke bhañvar se nikalnā bhī mumkin nahīñ hai

hameñ āshnā sī nigāhoñ se

sabze meñ lipTī havā ne bulāyā to

ham gir paḌeñge

ḳhizāñ ke shajar se

koī āḳhirī phuul ban kar

hamāre har ik ā.īne kā to sheva hai bas

TūTte dil ke ehsās se TuuT jaanā

qayāfa lagānā

bhalā kaun sī aañkh namkīn se jhuuT ke pāniyoñ se bharī hai

bhalā kaun se hoñT shīrīniyāñ bāñTte haiñ

shurūāt-e-chāhat meñ aisā qayāfa lagānā nahīñ jānte ham

tumhaare gale mein

nae KHwab ke motiyon ki sunahri si mala

hamari nahin hai

samundar wo jis par

tumhaare qadam kashtiyan hon

hamein sirf dars-e-fana hai

hamare liye to

kisi ajnabi si sada ke bhanwar se nikalna bhi mumkin nahin hai

hamein aashna si nigahon se

sabze mein lipTi hawa ne bulaya to

hum gir paDenge

KHizan ke shajar se

koi aaKHiri phul ban kar

hamare har ek aaine ka to shewa hai bas

TuTte dil ke ehsas se TuT jaana

qayafa lagana

bhala kaun si aankh namkin se jhuT ke paniyon se bhari hai

bhala kaun se honT shiriniyan banTte hain

shuruat-e-chahat mein aisa qayafa lagana nahin jaante hum