bad-gumani

lamha lamha hai hayāt-e-kārgar kā mo'atabar

sajda-sajda hai dil-e-āshufta-sar kā mo'atabar

zarra-zarra hai vafā kī rahguzar kā mo'atabar

rafta-rafta hotī jaatī hai mujassam aarzū

kyā miTānā chāhtā hai lutf ke parde meñ tū

multafit nazreñ nazar aatī haiñ kam-kam hī sahī

iltifāt-e-husn kī raftār maddham hī sahī

har adā meñ to karam hai zulf-e-barham hī sahī

ye gumāñ hotā hai koī shai nahīñ hai justujū

kyā miTānā chāhtā hai lutf ke parde meñ tū

zehn-e-shā.ir kī mukammal quvvat-e-parvāz hai

terā jo lahja hai merī ruuh kī āvāz hai

raunaq-e-har-anjuman hai har chaman kā raaz hai

ai sarāpā sher-o-naġhma ai mujassam rang-o-bū

kyā miTānā chāhtā hai lutf ke parde meñ tū

kā.enāt-e-arsh-o-kursī sar-nigūñ maujūd hai

ruuh mahv-e-bandagī hai zindagī masjūd hai

ab maiñ samjhā huuñ ki do-ālam kā kyā maqsūd hai

raaz kab khultā agar jalva na hotā rū-ba-rū

kyā miTānā chāhtā hai lutf ke parde meñ tū

aa gayā ye husn kī fitrat meñ kaisā inqalāb

ishq kā har har nafas hai ab payām-e-kāmyāb

sāmne be-parda aane meñ nahīñ kuchh ijtināb

ye nigāh-e-multajī ye bholī bholī guftugū

kyā miTānā chāhtā hai lutf ke parde meñ tū

ālam-e-asbāb meñ aisā kahīñ hotā nahīñ

husn-e-ḳhud-bīñ ishq ke zer-e-nagīñ hotā nahīñ

ye to sab kuchh hai magar mujh ko yaqīñ hotā nahīñ

sochtā huuñ tere dil meñ aur merī aarzū

kyā miTānā chāhtā hai lutf ke parde meñ tū

qahr to kyā lutf kī nazroñ se bhī bachtā huuñ maiñ

tujh se bargashta nahīñ apne se bargashta huuñ maiñ

is liye ab iltifāt-e-husn par hañstā huuñ maiñ

ye dil-e-nā-kāmyāb aur kāmyāb-e-ārzū

kyā miTānā chāhtā hai lutf ke parde meñ tū

ḳhvāb-e-shīrīñ hī kahīñ ḳhvāb-e-pareshāñ to nahīñ

jān-e-jāñ samjhā huuñ jis ko dushman-e-jāñ to nahīñ

ye tabāhī kā mirī rangīn unvāñ to nahīñ

yaksūī hāsil nahīñ merī nazar hai chār-sū

kyā miTānā chāhtā hai lutf ke parde meñ tū

zāhirī ye rabt-e-ulfat bhī kabhī dhokā na ho

ai yaqīn-e-iltifāt-e-husn phir aisā na ho

mujh ko vo kuchh dekhnā ho jo kabhī dekhā na ho

phir dil-e-pur-ārzū ho aur terī justujū

kyā miTānā chāhtā hai lutf ke parde meñ tū

haañ abhī baaqī hai kuchh kuchh zehn-o-dil par iḳhtiyār

haañ abhī duniyā-e-zabt-e-shauq kā huuñ shahryār

haañ abhī tujh par nahīñ merī tabāhī kā madār

haañ abhī puḳhta nahīñ dil meñ binā-e-ārzū

kyā miTānā chāhtā hai lutf ke parde meñ tū

raushnī-e-tab.a ke hāthoñ nahīñ hāsil sukūñ

zehn-o-dil kī kashmakash alfāz meñ kyūñkar kahūñ

jur.at-e-rindāna meñ shāmil hai kuchh juzv-e-junūñ

ye bhalā kahne kī kab bāteñ thī tere rū-ba-rū

kyā miTānā chāhtā hai lutf ke parde meñ tū

lamha lamha hai hayat-e-kargar ka mo'atabar

sajda-sajda hai dil-e-ashufta-sar ka mo'atabar

zarra-zarra hai wafa ki rahguzar ka mo'atabar

rafta-rafta hoti jati hai mujassam aarzu

kya miTana chahta hai lutf ke parde mein tu

multafit nazren nazar aati hain kam-kam hi sahi

iltifat-e-husn ki raftar maddham hi sahi

har ada mein to karam hai zulf-e-barham hi sahi

ye guman hota hai koi shai nahin hai justuju

kya miTana chahta hai lutf ke parde mein tu

zehn-e-shair ki mukammal quwwat-e-parwaz hai

tera jo lahja hai meri ruh ki aawaz hai

raunaq-e-har-anjuman hai har chaman ka raaz hai

ai sarapa sher-o-naghma ai mujassam rang-o-bu

kya miTana chahta hai lutf ke parde mein tu

kaenat-e-arsh-o-kursi sar-nigun maujud hai

ruh mahw-e-bandagi hai zindagi masjud hai

ab main samjha hun ki do-alam ka kya maqsud hai

raaz kab khulta agar jalwa na hota ru-ba-ru

kya miTana chahta hai lutf ke parde mein tu

aa gaya ye husn ki fitrat mein kaisa inqalab

ishq ka har har nafas hai ab payam-e-kaamyab

samne be-parda aane mein nahin kuchh ijtinab

ye nigah-e-multaji ye bholi bholi guftugu

kya miTana chahta hai lutf ke parde mein tu

aalam-e-asbab mein aisa kahin hota nahin

husn-e-KHud-bin ishq ke zer-e-nagin hota nahin

ye to sab kuchh hai magar mujh ko yaqin hota nahin

sochta hun tere dil mein aur meri aarzu

kya miTana chahta hai lutf ke parde mein tu

qahr to kya lutf ki nazron se bhi bachta hun main

tujh se bargashta nahin apne se bargashta hun main

is liye ab iltifat-e-husn par hansta hun main

ye dil-e-na-kaamyab aur kaamyab-e-arzu

kya miTana chahta hai lutf ke parde mein tu

KHwab-e-shirin hi kahin KHwab-e-pareshan to nahin

jaan-e-jaan samjha hun jis ko dushman-e-jaan to nahin

ye tabahi ka meri rangin unwan to nahin

yaksui hasil nahin meri nazar hai chaar-su

kya miTana chahta hai lutf ke parde mein tu

zahiri ye rabt-e-ulfat bhi kabhi dhoka na ho

ai yaqin-e-iltifat-e-husn phir aisa na ho

mujh ko wo kuchh dekhna ho jo kabhi dekha na ho

phir dil-e-pur-arzu ho aur teri justuju

kya miTana chahta hai lutf ke parde mein tu

han abhi baqi hai kuchh kuchh zehn-o-dil par iKHtiyar

han abhi duniya-e-zabt-e-shauq ka hun shahryar

han abhi tujh par nahin meri tabahi ka madar

han abhi puKHta nahin dil mein bina-e-arzu

kya miTana chahta hai lutf ke parde mein tu

raushni-e-taba ke hathon nahin hasil sukun

zehn-o-dil ki kashmakash alfaz mein kyunkar kahun

jurat-e-rindana mein shamil hai kuchh juzw-e-junun

ye bhala kahne ki kab baaten thi tere ru-ba-ru

kya miTana chahta hai lutf ke parde mein tu