badan ka nauha

maiñ ne kal ek ḳhvāb dekhā

ki maiñ ḳhvāb dekh rahā huuñ

merī niiñd mere jism ke andar rah rahī hai

mujh tak muntaqil nahīñ ho pā rahī

āñkhoñ meñ basārat hai

magar mujhe dikhā.ī nahīñ de rahā

maiñ chaltā huuñ

magar paañv harkat nahīñ kar paate

ghuTan ke maare saañs letā huuñ

to ret muñh se nikaltī hai

maiñ ḳhvāb se be-dār ho jaatā huuñ

ḳhauf kī thakāvaT mere jism se utarne lagtī hai

to maiñ mahsūs kartā huuñ

maiñ dīvāroñ se is tarah guzar rahā huuñ

jaise shīshe se raushnī...

jaise darvāze kī durzoñ se havaa...

maiñ haath lambe kar ke sitāre toḌ laatā huuñ

aur paañv phailā ke zamīn meñ utar jaatā huuñ

mujh meñ yak-dam ḳhvāhish paidā hotī hai

ki maiñ chīḳhūñ

chīḳhne kī andoh-nāk kaifiyat ke bojh tale aa kar

maiñ ek baar phir dab jaatā huuñ

main ne kal ek KHwab dekha

ki main KHwab dekh raha hun

meri nind mere jism ke andar rah rahi hai

mujh tak muntaqil nahin ho pa rahi

aankhon mein basarat hai

magar mujhe dikhai nahin de raha

main chalta hun

magar panw harkat nahin kar pate

ghuTan ke mare sans leta hun

to ret munh se nikalti hai

main KHwab se be-dar ho jata hun

KHauf ki thakawaT mere jism se utarne lagti hai

to main mahsus karta hun

main diwaron se is tarah guzar raha hun

jaise shishe se raushni

jaise darwaze ki durzon se hawa

main hath lambe kar ke sitare toD lata hun

aur panw phaila ke zamin mein utar jata hun

mujh mein yak-dam KHwahish paida hoti hai

ki main chiKHun

chiKHne ki andoh-nak kaifiyat ke bojh tale aa kar

main ek bar phir dab jata hun