baDhe chalo

baḌhe chalo baḌhe chalo

misāl-e-bū-e-bostāñ

ba-rang-e-mauj-e-naġhma-ḳhvāñ

qadam qadam ravāñ ravāñ

qatār-dar-qatār haañ

baḌhe chalo baḌhe chalo

vo soz-o-sāz-e-'āshiqī

vo rāh-o-rasm-e-dostī

vo zindagī vo sarḳhushī

vo ne'mateñ yahāñ kahāñ

baḌhe chalo baḌhe chalo

tamām 'umr sair kī

haram kī aur dair kī

ḳhabar milī na ḳhair kī

bas ek shar hai jāvedāñ

baḌhe chalo baḌhe chalo

junūñ-zada hai aadmī

junūn bhī hai maz.habī

ki jis kī tah meñ tīrgī

hai kufr-bez-o-shar-fashāñ

baḌhe chalo baḌhe chalo

kahīñ hai banda-e-ḳhudā

nishān-e-qabr par fidā

kahīñ hai gaa.e devtā

ye diin hai ki chīstāñ

baḌhe chalo baḌhe chalo

ye maz.habī jamā’ateñ

ye dā.imī riqābateñ

ye dozaḳhī ḳhabāsateñ

haiñ zahr-bez-o-ḳhūñ-fishāñ

baḌhe chalo baḌhe chalo

tumhī kaho ye hādse

haiñ kufr ke ki diin ke

jale hue ye jhoñpaḌe

luTī huī ye bastiyāñ

baḌhe chalo baḌhe chalo

ye aadmī hai aadmī

ki aadmī kī laash sī

ye nauha-ḳhvāñ hai zindagī

ki chīḳhtī haiñ haDDiyāñ

baḌhe chalo baḌhe chalo

vo zohd kā ġhurūr hai

ki 'ishq se nufūr hai

vo auj-e-makr-o-zor hai

ki al-hafīz-o-al-amāñ

baḌhe chalo baḌhe chalo

ye shaiḳh aur barahman

mujaddidān-e-makr-o-fan

kafan-khasoT rāhzan

haiñ musta'id jahāñ tahāñ

baḌhe chalo baḌhe chalo

ye qaid-o-band toḌ do

‘inān-e-fikr moḌ do

bas ab yahīñ pe chhoḌ do

ye choTiyāñ ye dāḌhiyāñ

baḌhe chalo baḌhe chalo

qadam baḌhāo dosto

ab us dayār ko chalo

jahāñ na ġham na ḳhauf ho

na zindagī kī talḳhiyāñ

baḌhe chalo baḌhe chalo

jahāñ duī kī bū na ho

jahāñ koī 'adū na ho

fareb-e-mā-o-tū na ho

jahāñ ho 'ishq hukmrāñ

baḌhe chalo baḌhe chalo

jahāñ na ho mahājanī

jahāñ ho har bashar ġhanī

jahāñ diloñ kī raushnī

se jagmagā.eñ bastiyāñ

baḌhe chalo baḌhe chalo

jahāñ sadā bahār ho

sukūn ho qarār ho

sharāb ho nigār ho

aur āsmāñ ho mehrbāñ

baḌhe chalo baḌhe chalo

jahāñ ho 'ashk' zindagī

ik imbisāt-e-dā.imī

jahāñ faqat hañsī ḳhushī

meñ ho najāt-e-ins-o-jāñ

baḌhe chalo baḌhe chalo

baDhe chalo baDhe chalo

misal-e-bu-e-bostan

ba-rang-e-mauj-e-naghma-KHwan

qadam qadam rawan rawan

qatar-dar-qatar han

baDhe chalo baDhe chalo

wo soz-o-saz-e-'ashiqi

wo rah-o-rasm-e-dosti

wo zindagi wo sarKHushi

wo ne'maten yahan kahan

baDhe chalo baDhe chalo

tamam 'umr sair ki

haram ki aur dair ki

KHabar mili na KHair ki

bas ek shar hai jawedan

baDhe chalo baDhe chalo

junun-zada hai aadmi

junun bhi hai mazhabi

ki jis ki tah mein tirgi

hai kufr-bez-o-shar-fashan

baDhe chalo baDhe chalo

kahin hai banda-e-KHuda

nishan-e-qabr par fida

kahin hai gae dewta

ye din hai ki chistan

baDhe chalo baDhe chalo

ye mazhabi jama’aten

ye daimi riqabaten

ye dozaKHi KHabasaten

hain zahr-bez-o-KHun-fishan

baDhe chalo baDhe chalo

tumhi kaho ye hadse

hain kufr ke ki din ke

jale hue ye jhonpaDe

luTi hui ye bastiyan

baDhe chalo baDhe chalo

ye aadmi hai aadmi

ki aadmi ki lash si

ye nauha-KHwan hai zindagi

ki chiKHti hain haDDiyan

baDhe chalo baDhe chalo

wo zohd ka ghurur hai

ki 'ishq se nufur hai

wo auj-e-makr-o-zor hai

ki al-hafiz-o-al-aman

baDhe chalo baDhe chalo

ye shaiKH aur barahman

mujaddidan-e-makr-o-fan

kafan-khasoT rahzan

hain musta'id jahan tahan

baDhe chalo baDhe chalo

ye qaid-o-band toD do

‘inan-e-fikr moD do

bas ab yahin pe chhoD do

ye choTiyan ye daDhiyan

baDhe chalo baDhe chalo

qadam baDhao dosto

ab us dayar ko chalo

jahan na gham na KHauf ho

na zindagi ki talKHiyan

baDhe chalo baDhe chalo

jahan dui ki bu na ho

jahan koi 'adu na ho

fareb-e-ma-o-tu na ho

jahan ho 'ishq hukmran

baDhe chalo baDhe chalo

jahan na ho mahajani

jahan ho har bashar ghani

jahan dilon ki raushni

se jagmagaen bastiyan

baDhe chalo baDhe chalo

jahan sada bahaar ho

sukun ho qarar ho

sharab ho nigar ho

aur aasman ho mehrban

baDhe chalo baDhe chalo

jahan ho 'ashk' zindagi

ek imbisat-e-daimi

jahan faqat hansi KHushi

mein ho najat-e-ins-o-jaan

baDhe chalo baDhe chalo