badi ka anjam

banāyā thā chiḌiyā ne ik ghoñsla

ki vo ek ghar ke thā chhat meñ banā

hue ek baar us ke bachche vahāñ

khilātī ġhizā lā ke bachchoñ ko maañ

vo bahr-e-ġhizā thī kisī din ga.ī

pareshāñ huī jab vo vāpas huī

ki bachche to haiñ lekin aafat ye thī

ki baiThā hai bachchoñ meñ ik saañp bhī

pareshān aur muztarib ho ga.ī

bahut āh-zārī se fariyād kī

magar saañp bachchoñ ko khāne lagā

to us ne bahut minnatoñ se kahā

jo tū kar rahā hai ye harakat burī

zarūr intiqām is kā lūñgī kabhī

sunī jab ki ye saañp ne guftugū

lagā kahne hañs kar satā.egī tū

vo huuñ maiñ bahādur ki Dartā hai sher

karegī bhalā tū mujhe kaise zer

ġharaz donoñ bachchoñ ko vo khā gayā

shikam-ser ho kar vahīñ so rahā

ye dekhā jo chiḌiyā ne āñkhoñ se haal

to phir saañp par ġhussa aayā kamāl

judā.ī meñ bachchoñ ke rotī rahī

vo is ranj meñ jaan khotī rahī

huī shab charāġhoñ meñ battī paḌī

to jaltī huī battī le kar uḌī

jahāñ saañp thā chhat meñ soyā huā

vahāñ us ne battī ko ab rakh diyā

jo logoñ ne dekhā to ghabrā ga.e

ki aisā na ho aag chhat meñ lage

koī aadmī jald chhat par chaḌhā

lagā saaf karne vo jab ghoñsla

vahāñ us ne dekhā ki hai ek maar

to fauran hī laTh se diyā us ko maar

hai 'faizī' ye zarbul-masal mustanad

badī kā hamesha hai anjām bad

banaya tha chiDiya ne ek ghonsla

ki wo ek ghar ke tha chhat mein bana

hue ek bar us ke bachche wahan

khilati ghiza la ke bachchon ko man

wo bahr-e-ghiza thi kisi din gai

pareshan hui jab wo wapas hui

ki bachche to hain lekin aafat ye thi

ki baiTha hai bachchon mein ek sanp bhi

pareshan aur muztarib ho gai

bahut aah-zari se fariyaad ki

magar sanp bachchon ko khane laga

to us ne bahut minnaton se kaha

jo tu kar raha hai ye harakat buri

zarur intiqam is ka lungi kabhi

suni jab ki ye sanp ne guftugu

laga kahne hans kar sataegi tu

wo hun main bahadur ki Darta hai sher

karegi bhala tu mujhe kaise zer

gharaz donon bachchon ko wo kha gaya

shikam-ser ho kar wahin so raha

ye dekha jo chiDiya ne aankhon se haal

to phir sanp par ghussa aaya kamal

judai mein bachchon ke roti rahi

wo is ranj mein jaan khoti rahi

hui shab charaghon mein batti paDi

to jalti hui batti le kar uDi

jahan sanp tha chhat mein soya hua

wahan us ne batti ko ab rakh diya

jo logon ne dekha to ghabra gae

ki aisa na ho aag chhat mein lage

koi aadmi jald chhat par chaDha

laga saf karne wo jab ghonsla

wahan us ne dekha ki hai ek mar

to fauran hi laTh se diya us ko mar

hai 'faizi' ye zarbul-masal mustanad

badi ka hamesha hai anjam bad