baghair unwan ke

din aayā na malbūs badal ke na nikhar ke

aur log bhī nikle na shagufta na chamakdār

tab maiñ ne sochā mire kāġhaz ke ġhubbāre na nācheñ to behtar hai

ik umr kā sadma hai bahut talḳh zamīñ ko

na sālgirah aaj manā.ūñ maiñ to behtar

vo bhī nahīñ ḳhush aur na ḳhush din kā guzar hai

ai umr tirā saḳht akele kā safar hai

tab maiñ ne kahā chāñd agar apne badan ko

aurat kā badan de to maiñ kāñToñ ke tarāzū

dil de ke badal luuñ

dil de ke badal luuñ maiñ qayāmat bhī gahan bhī

aur un ke evaz us se kahūñ aaj ke din to

ruk merī zamīñ par

taqdīr havā ban ke daraḳhtoñ meñ khaḌī hai

aur maiñ ai ajab chiiz chaTānoñ pe girā huuñ

din aaya na malbus badal ke na nikhar ke

aur log bhi nikle na shagufta na chamakdar

tab main ne socha mere kaghaz ke ghubbare na nachen to behtar hai

ek umr ka sadma hai bahut talKH zamin ko

na salgirah aaj manaun main to behtar

wo bhi nahin KHush aur na KHush din ka guzar hai

ai umr tera saKHt akele ka safar hai

tab main ne kaha chand agar apne badan ko

aurat ka badan de to main kanTon ke taraazu

dil de ke badal lun

dil de ke badal lun main qayamat bhi gahan bhi

aur un ke ewaz us se kahun aaj ke din to

ruk meri zamin par

taqdir hawa ban ke daraKHton mein khaDi hai

aur main ai ajab chiz chaTanon pe gira hun