bahaar ke din

aayā hai bahār kā zamāna

bāġhoñ ke nikhār kā zamāna

kaliyāñ kyā kyā chaTak rahī haiñ

saarī rausheñ mahak rahī haiñ

halkī halkī ye un kī ḳhushbū

phailī huī hai chaman meñ har sū

chiḌiyāñ gaatī haiñ giit pyāre

sunte haiñ chaman meñ phuul saare

shāḳhoñ kā banā liyā hai jhūlā

phūloñ se ladā huā hai jhūlā

koñpal har ik hai kaisī pyārī

sabzī meñ jhalak rahī hai surḳhī

kitnī rāhat-fazā huā hai

goyā jannat kā dar khulā hai

ḳhush ḳhush har ek aadmī hai

har shai meñ balā kī dilkashī hai

ye sub.h kā dil-fareb manzar

ye shaam kā husn rūh-parvar

ye raat ko chāñdnī kā aalam

allāh re be-ḳhudī kā aalam

kaisī dilchasp chāñdnī hai

chādar ik nuur kī tanī hai

har dil meñ umañg kis qadar hai

sab par hī bahār kā asar hai

saḌkoñ pe jo log jā rahe haiñ

ġhazleñ 'afsar' kī gaar rahe haiñ

aaya hai bahaar ka zamana

baghon ke nikhaar ka zamana

kaliyan kya kya chaTak rahi hain

sari raushen mahak rahi hain

halki halki ye un ki KHushbu

phaili hui hai chaman mein har su

chiDiyan gati hain git pyare

sunte hain chaman mein phul sare

shaKHon ka bana liya hai jhula

phulon se lada hua hai jhula

konpal har ek hai kaisi pyari

sabzi mein jhalak rahi hai surKHi

kitni rahat-faza hua hai

goya jannat ka dar khula hai

KHush KHush har ek aadmi hai

har shai mein bala ki dilkashi hai

ye subh ka dil-fareb manzar

ye sham ka husn ruh-parwar

ye raat ko chandni ka aalam

allah re be-KHudi ka aalam

kaisi dilchasp chandni hai

chadar ek nur ki tani hai

har dil mein umang kis qadar hai

sab par hi bahaar ka asar hai

saDkon pe jo log ja rahe hain

ghazlen 'afsar' ki gar rahe hain