bait-e-ankabut

ye aurat is liye paidā huī hai

ki is ko TukḌe TukḌe kar ke phāñsī par chaḌhāyā jaa.e

ise yūnān ke ik mash.hūr Daaku ke bistar kī zarūrat hai

(vo apne sab shikāroñ kā qadd-o-qāmat isī bistar ke paimāne kī nisbat se ghaTātā kāTtā yā

khīñch kā jabran baḌhātā thaa)

ḳhutūt-e-lab to dekho!

kis tarah simTe hue haiñ, sañg-e-dil

āmiyāna-pan tarāvish kar rahā hai

ye kīna-tūz āñkheñ

in kī gahrā.ī ke kīchaḌ meñ

sunahrī machhliyāñ ġhote lagātī haiñ

rupahlī shāḳh tauba hai ki khultī baañh hai, lekin

koī saaya nahīñ paḌtā!

maiñ apne ḳhol ke andar simaT kar baiTh rahnā chāhtā huuñ

mujhe mīnār kī khiḌkī se jhuk kar jhāñkne kī zarūrat kuchh nahīñ hai

magar vo fāhisha zanjīr-e-dar kī niiñd uḌaa.e jā rahī hai

vo āñkheñ ḳhūbsūrat ban ga.ī haiñ!

mujhe

ḳhamdār zīnoñ se utar kar

nīche aanā hī paḌegā

ye aurat is liye paida hui hai

ki is ko TukDe TukDe kar ke phansi par chaDhaya jae

ise yunan ke ek mashhur Daku ke bistar ki zarurat hai

(wo apne sab shikaron ka qadd-o-qamat isi bistar ke paimane ki nisbat se ghaTata kaTta ya

khinch ka jabran baDhata tha)

KHutut-e-lab to dekho!

kis tarah simTe hue hain, sang-e-dil

aamiyana-pan tarawish kar raha hai

ye kina-tuz aankhen

in ki gahrai ke kichaD mein

sunahri machhliyan ghote lagati hain

rupahli shaKH tauba hai ki khulti banh hai, lekin

koi saya nahin paDta!

main apne KHol ke andar simaT kar baiTh rahna chahta hun

mujhe minar ki khiDki se jhuk kar jhankne ki zarurat kuchh nahin hai

magar wo fahisha zanjir-e-dar ki nind uDae ja rahi hai

wo aankhen KHubsurat ban gai hain!

mujhe

KHamdar zinon se utar kar

niche aana hi paDega