bajte hain duhal

qāfile vaalo zarā tez chalo tez chalo

kitne dildār haiñ āġhāz-e-safar ke lamhāt

bām-e-gardūñ se utartī hai sitāroñ kī barāt

apne sho.aloñ se ulajhne lagī tārīḳh kī lau

nūr-afgan haiñ jabīnoñ pe diloñ ke partav

zindagī sajtī hai kis shoḳh adā kā mahmil

ḳham-ba-ḳham rāh-guzāroñ ke dhaḌakne lage dil

vus.at-e-najd meñ bedār huā zauq-e-junūñ

ishq kī nabzoñ meñ bhaḌkī na.e andāz se aag

dil ke har taar pe lahrāte haiñ dahke hue raag

kitnā hai shoḳh-zabāñ kākul-o-ruḳh kā afsūñ

husn ne bhejā hai dīvānoñ ko paiġhām nayā

baḌh ga.ī kah ke sabā tez chalo tez chalo

qāfile vaalo zarā tez chalo tez chalo

baḌhte qadmoñ ke diye jalte chale jaate haiñ

sāñsoñ kī aañch se kohsār gale jaate haiñ

jaras-e-vaqt kī āvāz khilātī hai kañval

mauj-e-anfās hai yā bajte haiñ sīnoñ meñ duhal

hausle shorish-e-tūfāñ ko sadā dete haiñ

qatre ko manzil-e-gauhar kā pata dete haiñ

munjamid lamhoñ ke ḳhirman pe lapakte haiñ sharār

jhilmilātā huā uThtā hai marāhil kā ġhubār

soz-e-pinhāñ kī taḌap kab huī pāband-e-rusūm

kis ko batlā.iye kaliyoñ kī chaTak kā mafhūm

aa.ī āvāz-e-darā tez chalo tez chalo

qāfile vaalo zarā tez chalo tez chalo

qafile walo zara tez chalo tez chalo

kitne dildar hain aaghaz-e-safar ke lamhat

baam-e-gardun se utarti hai sitaron ki baraat

apne shoalon se ulajhne lagi tariKH ki lau

nur-afgan hain jabinon pe dilon ke partaw

zindagi sajti hai kis shoKH ada ka mahmil

KHam-ba-KHam rah-guzaron ke dhaDakne lage dil

wusat-e-najd mein bedar hua zauq-e-junun

ishq ki nabzon mein bhaDki nae andaz se aag

dil ke har tar pe lahraate hain dahke hue rag

kitna hai shoKH-zaban kakul-o-ruKH ka afsun

husn ne bheja hai diwanon ko paigham naya

baDh gai kah ke saba tez chalo tez chalo

qafile walo zara tez chalo tez chalo

baDhte qadmon ke diye jalte chale jate hain

sanson ki aanch se kohsar gale jate hain

jaras-e-waqt ki aawaz khilati hai kanwal

mauj-e-anfas hai ya bajte hain sinon mein duhal

hausle shorish-e-tufan ko sada dete hain

qatre ko manzil-e-gauhar ka pata dete hain

munjamid lamhon ke KHirman pe lapakte hain sharar

jhilmilata hua uThta hai marahil ka ghubar

soz-e-pinhan ki taDap kab hui paband-e-rusum

kis ko batlaiye kaliyon ki chaTak ka mafhum

aai aawaz-e-dara tez chalo tez chalo

qafile walo zara tez chalo tez chalo