bangal

jahān-e-kohna ke maflūj falsafa-dāno

nizām-e-nau ke taqāze savāl karte haiñ

ye shāhrāheñ isī vāste banī thiiñ kyā

ki in pe des kī jantā sisak sisak ke mare

zamīñ ne kyā isī kāran anaaj uglā thā

ki nasl-e-ādam-o-havvā bilak bilak ke mare

mileñ isī liye resham ke Dher buntī haiñ

ki duḳhtarān-e-vatan taar taar ko tarseñ

chaman ko is liye maalī ne ḳhuuñ se sīñchā thā

ki us kī apnī nigāheñ bahār ko tarseñ

zamīñ kī quvvat-e-taḳhlīq ke ḳhudā-vando

miloñ ke muntazimoñ saltanat ke farzando

pachās laakh fasurda gale-saḌe Dhāñche

nizām-e-zar ke ḳhilāf ehtijāj karte haiñ

ḳhamosh hoñToñ se dam toḌtī nigāhoñ se

bashar bashar ke ḳhilāf ehtijāj karte haiñ

jahan-e-kohna ke mafluj falsafa-dano

nizam-e-nau ke taqaze sawal karte hain

ye shahrahen isi waste bani thin kya

ki in pe des ki janta sisak sisak ke mare

zamin ne kya isi karan anaj ugla tha

ki nasl-e-adam-o-hawwa bilak bilak ke mare

milen isi liye resham ke Dher bunti hain

ki duKHtaran-e-watan tar tar ko tarsen

chaman ko is liye mali ne KHun se sincha tha

ki us ki apni nigahen bahaar ko tarsen

zamin ki quwwat-e-taKHliq ke KHuda-wando

milon ke muntazimon saltanat ke farzando

pachas lakh fasurda gale-saDe Dhanche

nizam-e-zar ke KHilaf ehtijaj karte hain

KHamosh honTon se dam toDti nigahon se

bashar bashar ke KHilaf ehtijaj karte hain