barsat ki bahaaren

Nazeer Akbarabadi

barsat ki bahaaren

Nazeer Akbarabadi

MORE BYNazeer Akbarabadi

    haiñ is havā meñ kyā kyā barsāt bahāreñ

    sabzoñ lahlahāhaT bāġhāt bahāreñ

    būñdoñ jhamjhamāvaT qatrāt bahāreñ

    har baat ke tamāshe har ghaat bahāreñ

    kyā kyā machī haiñ yaaro barsāt bahāreñ

    bādal havā ke uupar ho mast chhā rahe haiñ

    jhaḌiyoñ mastiyoñ se dhūmeñ machā rahe haiñ

    paḌte haiñ paanī har jal-thal banā rahe haiñ

    gulzār bhīgte haiñ sabze nahā rahe haiñ

    kyā kyā machī haiñ yaaro barsāt bahāreñ

    maare haiñ mauj Dābar dariyā dauñD rahe haiñ

    mor-o-papīhe koyal kyā kyā rumañD rahe haiñ

    jhaḌ kar rahī haiñ jhaḌiyāñ naale umañD rahe haiñ

    barse hai muñh jhaḌā jhaḌ bādal ghumanD rahe haiñ

    kyā kyā machī haiñ yaaro barsāt bahāreñ

    jañgal sab apne tan par hariyālī saj rahe haiñ

    gul phuul jhāḌ-būTe kar apnī dhaj rahe haiñ

    bijlī chamak rahī hai bādal garaj rahe haiñ

    allāh ke naqāre naubat ke baj rahe haiñ

    kyā kyā machī haiñ yaaro barsāt bahāreñ

    bādal lagā Takoreñ naubat gat lagāveñ

    jheñgur jhañgār apnī surnā.iyañ bajāveñ

    kar shor mor bagule jhaḌiyoñ muñh bulāveñ

    kareñ papīhe meñDak malāreñ gāveñ

    kyā kyā machī haiñ yaaro barsāt bahāreñ

    har bichhā rahā hai sabza hare bichhaune

    qudrat ke bichh rahe haiñ har hare bichhaune

    jañgaloñ meñ ho rahe haiñ paidā hare bichhaune

    bichhvā diye haiñ haq ne kyā kyā hare bichhaune

    kyā kyā machī haiñ yaaro barsāt bahāreñ

    sabzoñ lahlahāhaT kuchh abr siyāhī

    aur chhā rahī ghaTā.eñ surḳh aur safed kaahī

    sab bhīgte haiñ ghar ghar le māh-tā-ba-māhī

    ye rañg kaun rañge tere sivā ilāhī

    kyā kyā machī haiñ yaaro barsāt bahāreñ

    kyā kyā rakhe haiñ yārab sāmān terī qudrat

    badle hai rañg kyā kyā har aan terī qudrat

    sab mast ho rahe pahchān terī qudrat

    tītar pukārte haiñ sub.hān terī qudrat

    kyā kyā machī haiñ yaaro barsāt bahāreñ

    koyal kuuk meñ bhī terā naam haigā

    aur mor zaTal meñ terā payām haigā

    ye rañg sau maze jo sub.h-o-shām haigā

    ye aur nahīñ hai terā kaam haigā

    kyā kyā machī haiñ yaaro barsāt bahāreñ

    bolīñ ba.e baTereñ qumrī pukāre kū-kū

    kare papīhā bagule pukāreñ tū-tū

    kyā hudhudoñ haq haq kyā fāḳhatoñ hū-hū

    sab raT rahe haiñ tujh ko kyā pañkh kyā pakherū

    kyā kyā machī haiñ yaaro barsāt māreñ

    jo mast hoñ idhar ke kar shor nāchte haiñ

    pyāre naam le kar kyā zor nāchte haiñ

    bādal havā se kar kar ghanghor nāchte haiñ

    meñDak uchhal rahe haiñ aur mor nāchte haiñ

    kyā kyā machī haiñ yaaro barsāt bahāreñ

    phūloñ sej uupar sote haiñ kitne ban-ban

    so haiñ gulābī joḌe phūloñ ke haar abran

    kitnoñ ke ghar hai khānā sonā lage hai āñgan

    kone meñ paḌ rahī haiñ sar muñh lapeT sogan

    kyā kyā machī haiñ yaaro barsāt bahāreñ

    jo ḳhush haiñ vo ḳhushī meñ kaaTe haiñ raat saarī

    jo ġham meñ haiñ unhoñ par guzre hai raat bhārī

    sīnoñ se lag rahī haiñ jo haiñ piyā pyārī

    chhātī phaTe hai un jo haiñ birah maarī

    kyā kyā machī haiñ yaaro barsāt bahāreñ

    jo vasl meñ haiñ un ke juuḌe mahak rahe haiñ

    jhūloñ meñ jhūlte haiñ gahne jhamak rahe haiñ

    jo dukh meñ haiñ so un ke siine phaḌak rahe haiñ

    aaheñ nikal rahī haiñ aañsū Tapak rahe haiñ

    kyā kyā machī haiñ yaaro barsāt bahāreñ

    ab birhanoñ ke uupar hai saḳht be-qarārī

    har buuñd mārtī hai siine upar kaTārī

    badlī dekh sūrat kahtī haiñ baarī baarī

    hai hai na piyā ne ab ke bhī sudh hamārī

    kyā kyā machī haiñ yaaro barsāt bahāreñ

    jab koyal apnī un ko āvāz hai sunātī

    sunte ġham ko maare chhātī hai umñDī aatī

    dhun ko sun kar be-kal haiñ kahtī jaatī

    mat bol ai papīhe phaTtī hai merī chhātī

    kyā kyā machī haiñ yaaro barsāt bahāreñ

    hai jin sej suunī aur ḳhālī chārpā.ī

    ro ro unhoñ ne har-dam ye baat hai sunā.ī

    pardesī ne hamārī ab ke bhī sudh bhulā.ī

    ab ke bhī chhāvnī pardes meñ hai chhā.ī

    kyā kyā machī haiñ yaaro barsāt bahāreñ

    kitnoñ ne apnī ġham se ab hai ye gat banā.ī

    maile kuchaile kapḌe āñkheñ bhī DabDabā.ī

    ne ghar meñ jhūlā Daalā ne oḌhnī rañgā.ī

    phūTā paḌā hai chūlhā TuuTī paḌī kaḌhā.ī

    kyā kyā machī haiñ yaaro barsāt bahāreñ

    gaatī hai giit koī jhūle pe kar ke pherā

    maaro aaj kījiye yaañ rain baserā

    hai ḳhush kisī ko aa kar hai dard-o-ġham ne gherā

    muñh zard baal bikhre aur āñkhoñ meñ añdherā

    kyā kyā machī haiñ yaaro barsāt bahāreñ

    aur jin ko ab muhayyā husnoñ Dheriyāñ haiñ

    surḳh aur sunahre kapḌe ishrat gheriyāñ haiñ

    mahbūb dilbaroñ zulfeñ bikheriyāñ haiñ

    jugnū chamak rahe haiñ rāteñ añdheriyāñ haiñ

    kyā kyā machī haiñ yaaro barsāt bahāreñ

    kitne to bhañg kapḌe bhigo rahe haiñ

    bāheñ guloñ meñ Daale jhūloñ meñ so rahe haiñ

    kitne birah ke maare sudh apnī kho rahe haiñ

    jhūle dekh sūrat har aan ro rahe haiñ

    kyā kyā machī haiñ yaaro barsāt bahāreñ

    baiThe haiñ kitne ḳhush ho ūñche chhuā ke bangle

    piite haiñ mai ke pyāle aur dekhte haiñ jañgle

    kitne phire haiñ bāhar ḳhūbāñ ko apne sañg le

    sab shaad ho rahe haiñ umda ġharīb kañgle

    kyā kyā machī haiñ yaaro barsāt bahāreñ

    kitnoñ ko mahloñ andar hai aish nazārā

    sā.ebān suthrā baañs usārā

    kartā hai sair koī koThe le sahārā

    muflis bhī kar rahā hai pole tale guzārā

    kyā kyā machī haiñ yaaro barsāt bahāreñ

    chhat girne kisī ġhul shor ho rahā hai

    dīvār bhī dhaḌkā kuchh hosh kho rahā hai

    dar dar havelī vaalā har aan ro rahā hai

    muflis so jhopḌe meñ dil-shād so rahā hai

    kyā kyā machī haiñ yaaro barsāt bahāreñ

    muddat se ho rahā hai jin makāñ purānā

    uTh ke hai un ko meñh meñ har aan chhat pe jaanā

    koī pukārtā hai Tuk morī khol aanā

    koī kahe hai chal bhī kyuuñ ho gayā divānā

    kyā kyā machī haiñ yaaro barsāt bahāreñ

    koī pukārtā hai lo ye makān Tapkā

    girtī hai chhat miTTī aur sā.ebān Tapkā

    chhalnī huī aTārī koThā nidān Tapkā

    baaqī thā ik usārā so vo bhī aan Tapkā

    kyā kyā machī haiñ yaaro barsāt bahāreñ

    ūñchā makān jis hai pach khanā sivāyā

    uupar khan Tapak kar jab paanī nīche aayā

    us ne to apne ghar meñ hai shor-ġhul machāyā

    muflis pukārte haiñ jaane hamārā

    kyā kyā machī haiñ yaaro barsāt bahāreñ

    sabzoñ pe biir bhūTī Tīloñ upar dhatūrē

    pissū se machchharoñ se ro.e koī basore

    bichchhū kisī ko kaaTe kiiḌā kisī ko ghūre

    āñgan meñ kansalā.ī konoñ meñ khankhajūre

    kyā kyā machī haiñ yaaro barsāt bahāreñ

    phuñsī kisī ke tan meñ sar par kisī ke phoḌe

    chhātī ye garmī daane aur piiTh meñ daroḌe

    khā pūriyāñ kisī ko haiñ lag rahe maroḌe

    aate haiñ dast jaise dauḌeñ irāqī ghoḌe

    kyā kyā machī haiñ yaaro barsāt bahāreñ

    patlī jahāñ kisī ne daal aur kaḌhī pakā.ī

    makkhī ne vohīñ bolī aa uuñT bulā.ī

    koī pukārtā hai kyuuñ ḳhair to hai bhaa.ī

    aise jo khāñste ho kyā kaalī mirch khaa.ī

    kyā kyā machī haiñ yaaro barsāt bahāreñ

    jis gul-badan ke tan meñ poshāk sausanī hai

    so vo parī to ḳhāsī kālī-ghaTā banī hai

    aur jis pe surḳh joḌā uudī oḌhnī hai

    us par to sab ghulāvaT barsāt chhanī hai

    kyā kyā machī haiñ yaaro barsāt bahāreñ

    badanoñ meñ khab rahe haiñ ḳhūboñ ke laal joḌe

    jhamkeñ dikhā rahe haiñ pariyoñ ke laal joḌe

    lahreñ banā rahe haiñ laḌkoñ ke laal joḌe

    āñkhoñ meñ chubh rahe haiñ pyāroñ ke laal joḌe

    kyā kyā machī haiñ yaaro barsāt bahāreñ

    aur jis sanam ke tan meñ joḌā hai zāfrānī

    gulnār gulābī zard surḳh dhānī

    kuchh husn chaḌhā.ī aur kuchh na.ī javānī

    jhūloñ meñ jhūlte haiñ uupar paḌe hai paanī

    kyā kyā machī haiñ yaaro barsāt bahāreñ

    koī to jhūlne meñ jhūle Dor chhoḌe

    sāthiyoñ meñ apne paañv se paañv joḌe

    bādal khaḌe haiñ sar par barse haiñ thoḌe thoḌe

    būñdoñ meñ bhīgte haiñ laal aur gulābī joḌe

    kyā kyā machī haiñ yaaro barsāt bahāreñ

    kitnoñ ko ho rahī hai us aish nishānī

    sote haiñ saath jis ke kahtī hai vo siyānī

    is vaqt tum na jaao ai mere yār-e-jānī

    dekho to kis maze se barse hai aaj paanī

    kyā kyā machī haiñ yaaro barsāt bahāreñ

    kitne sharāb kar ho mast chhak rahe haiñ

    mai gulābī aage pyāle chhalak rahe haiñ

    hotā hai naach ghar ghar ghuñghrū jhanak rahe haiñ

    paḌtā hai meñh jhaḌā-jhaḌ table khaḌak rahe haiñ

    kyā kyā machī haiñ yaaro barsāt bahāreñ

    haiñ jin ke tan mulā.em maide jaise loī

    vo is havā meñ ḳhāsī oḌhe phire haiñ loī

    aur jin muflisī ne sharm-o-hayā hai khoī

    hai un ke sar pe sar boriye khoī

    kyā kyā machī haiñ yaaro barsāt bahāreñ

    kitne phire haiñ oḌhe paanī meñ surḳh paTTū

    jo dekh surḳh badlī hotī hai un pe laTTū

    kitnoñ gaaḌī rath haiñ kitnoñ ke ghoḌe TaTTū

    jis paas kuchh nahīñ hai vo ham hai nikhaTTū

    kyā kyā machī haiñ yaaro barsāt bahāreñ

    jo is havā meñ yaaro daulat meñ kuchh baḌhe haiñ

    hai un ke sar pe chhatrī hāthī pe vo chaḌhe haiñ

    ham se ġharīb ġhorabā kīchaḌ meñ gir paḌe haiñ

    hāthoñ meñ jūtiyāñ haiñ aur pā.eñche chaḌhe haiñ

    kyā kyā machī haiñ yaaro barsāt bahāreñ

    hai jin kane muhayyā pakkā pakāyā khānā

    un ko palañg pe baiThe jhaḌiyoñ ḳhat uḌānā

    hai jin ko apne ghar meñ yaañ lon tel laanā

    hai sar pe un ke pañkhā chhāj hai purānā

    kyā kyā machī haiñ yaaro barsāt bahāreñ

    kitne ḳhushī se baiThe khāte haiñ ḳhush mahal meñ

    kitne chale haiñ lene baniye se qarz pal meñ

    kāñdhe pe daal aaTā haldī girah ne mal meñ

    hāthoñ meñ ghī pyālī aur lakḌiyāñ baġhal meñ

    kyā kyā machī haiñ yaaro barsāt bahāreñ

    jo kasbiyāñ javāneñ husnoñ meñ purtiyāñ haiñ

    sīnoñ meñ laal añgiyāñ aur laal kurtiyāñ haiñ

    nazreñ bhī badliyāñ haiñ dil meñ bhī surtiyāñ haiñ

    ik ik nigah meñ kāfir bijlī phurtiyāñ haiñ

    kyā kyā machī haiñ yaaro barsāt bahāreñ

    jo naujavāñ haiñ un tayyāriyāñ baḌī haiñ

    hāthoñ meñ laal chhaḌiyāñ koThoñ pe vo khaḌī haiñ

    aur vo jo āshnā se jhagḌī haiñ laḌī haiñ

    muñh ko chhupā palañg par machlī huī paḌī haiñ

    kyā kyā machī haiñ yaaro barsāt bahāreñ

    koī apne āshnā se kar naaz jhapaTTā

    kahtī hai hañs ke kāfir chuTkī le nihaTTā

    tum se to dil hamārā ab ho gayā hai khaTTā

    tum aaj bhī na laa.e rañvā mirā dupaTTā

    kyā kyā machī haiñ yaaro barsāt bahāreñ

    kahtī haiñ koī mujh ko joḌā sohā banā do

    TaaT baafī juutā kafsh-e-surḳh do

    koī kahe hai merī kurtī abhī rañgā do

    garm se andarse ik sair bhar mañgā do

    kyā kyā machī haiñ yaaro barsāt bahāreñ

    jo un ke mubtalā haiñ sab chiiz rahe haiñ

    kurtī banā rahe haiñ añgiyā rañgā rahe haiñ

    jo jo haiñ un bāteñ sab kuchh uThā rahe haiñ

    bāheñ gale meñ Daale ishrat manā rahe haiñ

    kyā kyā machī haiñ yaaro barsāt bahāreñ

    kitnoñ ne qaul bāñdhā ma.amūlī de ke paise

    kahte haiñ shaad ho kar yuuñ apne āshnā se

    barsāt-bhar to mil ke sunte ho jaan pyāre

    ahmaq ho jo palañg se ab mūtne ko utre

    kyā kyā machī haiñ yaaro barsāt bahāreñ

    ye sun ke un se hañs hañs kahtī hai shoḳh ranDī

    ma.amūlī ab to le kar bandī bhī hai ghamanDī

    ham pahneñ laal joḌā tum pahno ḳhāsī bañDī

    ḳhandī ho jo tumhārī chhātī kare na ThanDī

    kyā kyā machī haiñ yaaro barsāt bahāreñ

    zardār to un meñ hai bichh rahī palañgaḌī

    dilbar parī baiThī jhamkā.e chūḌī nibagaḌī

    muflis TuuTī paTTī TaaT jhalañgaḌī

    ranDī milī to kaalī kunjī luulī lañgḌī

    kyā kyā machī haiñ yaaro barsāt bahāreñ

    kurtī gulābī jin meñ goTe lage hue haiñ

    añgiyāñ ke gard jhūTe goTe Take hue haiñ

    kahtī haiñ un se hans hans jo jo kaTe hue haiñ

    ab to mere tujh par bārah Take hue haiñ

    kyā kyā machī haiñ yaaro barsāt bahāreñ

    jo begamī hai ghar meñ ārām kar rahī hai

    pardoñ meñ dostoñ se paiġhām kar rahī hai

    chitvan lāvaToñ se sau daam kar rahī hai

    chupke chupke apnā sab kaam kar rahī hai

    kyā kyā machī haiñ yaaro barsāt bahāreñ

    kahtā hai koī apne mahbūb sīm-bar se

    vo is meñh meñ na jaao pyāre hamāre barse

    koī kahe hai apne dildār-e-ḳhush-nazar se

    hāthoñ se mere jaanī khā le ye do andarse

    kyā kyā machī haiñ yaaro barsāt bahāreñ

    kahtā hai koī pyārī jo kuchh kaho sau deñ

    zar-dozī TāT-bāfī juutā kaho pahnā deñ

    peḌā jalebī laDDū jo khaao so mañgā deñ

    chīrā dupaTTa jaama jaisā kaho rañgā deñ

    kyā kyā machī haiñ yaaro barsāt bahāreñ

    jin dilbaroñ ke tan par haiñ garmī daane aale

    kahte haiñ un ko āshiq yuuñ pyaar se bulā le

    kyā meñh baras rahā hai pyāre zarā nahā le

    chhātī nahīñ to pyāre Tuk piiTh milā le

    kyā kyā machī haiñ yaaro barsāt bahāreñ

    is rut meñ haiñ jahāñ tak gulzār bhīgte haiñ

    shahr-o-dayār kūche bāzār bhīgte haiñ

    sahra-o-jhāḌ buuTe kohsār bhīgte haiñ

    āshiq nahā rahe haiñ dildār bhīgte haiñ

    kyā kyā machī haiñ yaaro barsāt bahāreñ

    kahtī hai jab vo sun kar ye baat bhiig ahmaq

    mārūñgī tere aa kar ik laat bhiig ahmaq

    mujh ko bhī zid chaḌhī hai din-rāt bhiig ahmaq

    yūñhī to ab ke saarī barsāt bhiig ahmaq

    kyā kyā machī haiñ yaaro barsāt bahāreñ

    zardār to sun kar āvāz vo parī-rū

    kahtī hai launDiyoñ se jaldī kivāḌ kholo

    muflis koī pukāre to is se kahtī hai vo

    hargiz koī na bolo ahmaq ko bhīgne do

    kyā kyā machī haiñ yaaro barsāt bahāreñ

    koī yaar se kahe hai ai dil-sitān aao

    badlī baḌī uThī hai kahne ko maan aao

    kyā meñh baras rahā hai har ik makān aao

    rāteñ añdheriyāñ haiñ ai merī jaan aao

    kyā kyā machī haiñ yaaro barsāt bahāreñ

    koī raat ko pukāre pyāre maiñ bhīgtī huuñ

    kyā terī ulfatoñ ke maare maiñ bhīgtī huuñ

    aa.ī huuñ terī ḳhātir aa re maiñ bhīgtī huuñ

    kuchh to taras miirā khā re maiñ bhīgtī huuñ

    kyā kyā machī haiñ yaaro barsāt bahāreñ

    koī pukārtī hai dil saḳht bhīgtī huuñ

    kāñpe hai merī chhātī yak-laḳht bhīgtī huuñ

    kapḌe bhī tar-ba-tar haiñ aur saḳht bhīgtī huuñ

    jaldī bulā le mujh ko kambaḳht bhīgtī huuñ

    kyā kyā machī haiñ yaaro barsāt bahāreñ

    shīsha kahīñ gulābī botal jhamak rahī hai

    rābīl motiyā ḳhushbū mahak rahī hai

    chhātī se chhātī lag kar ishrat chhalak rahī hai

    paa.e khaTak rahe haiñ paTTī chaTak rahī hai

    kyā kyā machī haiñ yaaro barsāt bahāreñ

    koī pukārtī hai kyā kyā mujhe bhigoyā

    koī pukārtī hai kaisā mujhe bhigoyā

    nāhaq qarār kar ke jhūTā mujhe bhigoyā

    yuuñ duur se bulā kar achchhā mujhe bhigoyā

    kyā kyā machī haiñ yaaro barsāt bahāreñ

    jin dilbaroñ ḳhātir bhīge haiñ jin ke joḌe

    vo dekh un ulfat hote haiñ thoḌe thoḌe

    le un ke bhīge kapḌe hāthoñ meñ dhar nichoḌe

    chīrā koī suñgāve jaama koī nichoḌe

    kyā kyā machī haiñ yaaro barsāt bahāreñ

    kīchaḌ se ho rahī hai jis zamīñ phisalnī

    mushkil huī hai vaañ se har ik ko raah chalnī

    phislā jo paañv pagḌī mushkil hai phir sambhalnī

    jotī girī to vaañ se kyā taab phir niklī

    kyā kyā machī haiñ yaaro barsāt bahāreñ

    kitne to कीचड़ों daldal meñ phañs rahe haiñ

    kapḌe tamām gandī daldal meñ bas rahe haiñ

    kitne uThe haiñ marmar kitne ukas rahe haiñ

    vo dukh meñ phañs rahe haiñ aur log hañs rahe haiñ

    kyā kyā machī haiñ yaaro barsāt bahāreñ

    kahtā hai koī gir kar ye ai ḳhudā.e liijo

    koī Dagmagā ke har-dam kahtā hai vaa.e liijo

    koī haath uThā pukāre mujh ko bhī haa.e liijo

    koī shor kar pukāre girne na paa.e liijo

    kyā kyā machī haiñ yaaro barsāt bahāreñ

    gir kar kisī ke kapḌe daldal meñ haiñ mo.attar

    phislā koī kisī kīchaḌ meñ muñh gayā bhar

    ik do nahīñ phisalte kuchh is meñ aan aksar

    hote haiñ saikḌoñ ke sar nīche paañv uupar

    kyā kyā machī haiñ yaaro barsāt bahāreñ

    ye rut vo hai ki jis meñ ḳhurd-o-kabīr ḳhush haiñ

    adnā ġharīb muflis shāh-o-vazīr ḳhush haiñ

    ma.ashūq shād-o-ḳhurram āshiq asiir ḳhush haiñ

    jitne haiñ ab jahāñ meñ sab ai 'nazīr' ḳhush haiñ

    kyā kyā machī haiñ yaaro barsāt bahāreñ

    hain is hawa mein kya kya barsat ki bahaaren

    sabzon ki lahlahahaT baghat ki bahaaren

    bundon ki jhamjhamawaT qatraat ki bahaaren

    har baat ke tamashe har ghat ki bahaaren

    kya kya machi hain yaro barsat ki bahaaren

    baadal hawa ke upar ho mast chha rahe hain

    jhaDiyon ki mastiyon se dhumen macha rahe hain

    paDte hain pani har ja jal-thal bana rahe hain

    gulzar bhigte hain sabze naha rahe hain

    kya kya machi hain yaro barsat ki bahaaren

    mare hain mauj Dabar dariya daunD rahe hain

    mor-o-papihe koyal kya kya rumanD rahe hain

    jhaD kar rahi hain jhaDiyan nale umanD rahe hain

    barse hai munh jhaDa jhaD baadal ghumanD rahe hain

    kya kya machi hain yaro barsat ki bahaaren

    jangal sab apne tan par hariyali saj rahe hain

    gul phul jhaD-buTe kar apni dhaj rahe hain

    bijli chamak rahi hai baadal garaj rahe hain

    allah ke naqare naubat ke baj rahe hain

    kya kya machi hain yaro barsat ki bahaaren

    baadal laga Takoren naubat ki gat lagawen

    jhengur jhangar apni surnaiyan bajawen

    kar shor mor bagule jhaDiyon ka munh bulawen

    pi pi karen papihe meinDak malaren gawen

    kya kya machi hain yaro barsat ki bahaaren

    har ja bichha raha hai sabza hare bichhaune

    qudrat ke bichh rahe hain har ja hare bichhaune

    jangalon mein ho rahe hain paida hare bichhaune

    bichhwa diye hain haq ne kya kya hare bichhaune

    kya kya machi hain yaro barsat ki bahaaren

    sabzon ki lahlahahaT kuchh abr ki siyahi

    aur chha rahi ghaTaen surKH aur safed kahi

    sab bhigte hain ghar ghar le mah-ta-ba-mahi

    ye rang kaun range tere siwa ilahi

    kya kya machi hain yaro barsat ki bahaaren

    kya kya rakhe hain yarab saman teri qudrat

    badle hai rang kya kya har aan teri qudrat

    sab mast ho rahe pahchan teri qudrat

    titar pukarte hain subhan teri qudrat

    kya kya machi hain yaro barsat ki bahaaren

    koyal ki kuk mein bhi tera hi nam haiga

    aur mor ki zaTal mein tera payam haiga

    ye rang sau maze ka jo subh-o-sham haiga

    ye aur ka nahin hai tera hi kaam haiga

    kya kya machi hain yaro barsat ki bahaaren

    bolin bae baTeren qumri pukare ku-ku

    pi pi kare papiha bagule pukaren tu-tu

    kya hudhudon ki haq haq kya faKHaton ki hu-hu

    sab raT rahe hain tujh ko kya pankh kya pakheru

    kya kya machi hain yaro barsat ki maren

    jo mast hon idhar ke kar shor nachte hain

    pyare ka nam le kar kya zor nachte hain

    baadal hawa se kar kar ghanghor nachte hain

    meinDak uchhal rahe hain aur mor nachte hain

    kya kya machi hain yaro barsat ki bahaaren

    phulon ki sej upar sote hain kitne ban-ban

    so hain gulabi joDe phulon ke haar abran

    kitnon ke ghar hai khana sona lage hai aangan

    kone mein paD rahi hain sar munh lapeT sogan

    kya kya machi hain yaro barsat ki bahaaren

    jo KHush hain wo KHushi mein kaTe hain raat sari

    jo gham mein hain unhon par guzre hai raat bhaari

    sinon se lag rahi hain jo hain piya ki pyari

    chhati phaTe hai un ki jo hain birah ki mari

    kya kya machi hain yaro barsat ki bahaaren

    jo wasl mein hain un ke juDe mahak rahe hain

    jhulon mein jhulte hain gahne jhamak rahe hain

    jo dukh mein hain so un ke sine phaDak rahe hain

    aahen nikal rahi hain aansu Tapak rahe hain

    kya kya machi hain yaro barsat ki bahaaren

    ab birhanon ke upar hai saKHt be-qarari

    har bund marti hai sine upar kaTari

    badli ki dekh surat kahti hain bari bari

    hai hai na li piya ne ab ke bhi sudh hamari

    kya kya machi hain yaro barsat ki bahaaren

    jab koyal apni un ko aawaz hai sunati

    sunte hi gham ko mare chhati hai umnDi aati

    pi pi ki dhun ko sun kar be-kal hain kahti jati

    mat bol ai papihe phaTti hai meri chhati

    kya kya machi hain yaro barsat ki bahaaren

    hai jin ki sej suni aur KHali chaarpai

    ro ro unhon ne har-dam ye baat hai sunai

    pardesi ne hamari ab ke bhi sudh bhulai

    ab ke bhi chhawni ja pardes mein hai chhai

    kya kya machi hain yaro barsat ki bahaaren

    kitnon ne apni gham se ab hai ye gat banai

    maile kuchaile kapDe aankhen bhi DabDabai

    ne ghar mein jhula Dala ne oDhni rangai

    phuTa paDa hai chulha TuTi paDi kaDhai

    kya kya machi hain yaro barsat ki bahaaren

    gati hai git koi jhule pe kar ke phera

    maro ji aaj kijiye yan rain ka basera

    hai KHush kisi ko aa kar hai dard-o-gham ne ghera

    munh zard baal bikhre aur aankhon mein andhera

    kya kya machi hain yaro barsat ki bahaaren

    aur jin ko ab muhayya husnon ki Dheriyan hain

    surKH aur sunahre kapDe ishrat ki gheriyan hain

    mahbub dilbaron ki zulfen bikheriyan hain

    jugnu chamak rahe hain raaten andheriyan hain

    kya kya machi hain yaro barsat ki bahaaren

    kitne to bhang pi pi kapDe bhigo rahe hain

    bahen gulon mein Dale jhulon mein so rahe hain

    kitne birah ke mare sudh apni kho rahe hain

    jhule ki dekh surat har aan ro rahe hain

    kya kya machi hain yaro barsat ki bahaaren

    baiThe hain kitne KHush ho unche chhua ke bangle

    pite hain mai ke pyale aur dekhte hain jangle

    kitne phire hain bahar KHuban ko apne sang le

    sab shad ho rahe hain umda gharib kangle

    kya kya machi hain yaro barsat ki bahaaren

    kitnon ko mahlon andar hai aish ka nazara

    ya saeban suthra ya bans ka usara

    karta hai sair koi koThe ka le sahaara

    muflis bhi kar raha hai pole tale guzara

    kya kya machi hain yaro barsat ki bahaaren

    chhat girne ka kisi ja ghul shor ho raha hai

    diwar ka bhi dhaDka kuchh hosh kho raha hai

    dar dar haweli wala har aan ro raha hai

    muflis so jhopDe mein dil-shad so raha hai

    kya kya machi hain yaro barsat ki bahaaren

    muddat se ho raha hai jin ka makan purana

    uTh ke hai un ko meinh mein har aan chhat pe jaana

    koi pukarta hai Tuk mori khol aana

    koi kahe hai chal bhi kyun ho gaya diwana

    kya kya machi hain yaro barsat ki bahaaren

    koi pukarta hai lo ye makan Tapka

    girti hai chhat ki miTTi aur saeban Tapka

    chhalni hui aTari koTha nidan Tapka

    baqi tha ek usara so wo bhi aan Tapka

    kya kya machi hain yaro barsat ki bahaaren

    uncha makan jis ka hai pach khana siwaya

    upar ka khan Tapak kar jab pani niche aaya

    us ne to apne ghar mein hai shor-ghul machaya

    muflis pukarte hain jaane hamara

    kya kya machi hain yaro barsat ki bahaaren

    sabzon pe bir bhuTi Tilon upar dhaturee

    pissu se machchharon se roe koi basore

    bichchhu kisi ko kaTe kiDa kisi ko ghure

    aangan mein kansalai konon mein khankhajure

    kya kya machi hain yaro barsat ki bahaaren

    phunsi kisi ke tan mein sar par kisi ke phoDe

    chhati ye garmi dane aur piTh mein daroDe

    kha puriyan kisi ko hain lag rahe maroDe

    aate hain dast jaise dauDen iraqi ghoDe

    kya kya machi hain yaro barsat ki bahaaren

    patli jahan kisi ne dal aur kaDhi pakai

    makkhi ne wohin boli aa unT ki bulai

    koi pukarta hai kyun KHair to hai bhai

    aise jo khanste ho kya kali mirch khai

    kya kya machi hain yaro barsat ki bahaaren

    jis gul-badan ke tan mein poshak sausani hai

    so wo pari to KHasi kali-ghaTa bani hai

    aur jis pe surKH joDa ya udi oDhni hai

    us par to sab ghulawaT barsat ki chhani hai

    kya kya machi hain yaro barsat ki bahaaren

    badanon mein khab rahe hain KHubon ke lal joDe

    jhamken dikha rahe hain pariyon ke lal joDe

    lahren bana rahe hain laDkon ke lal joDe

    aankhon mein chubh rahe hain pyaron ke lal joDe

    kya kya machi hain yaro barsat ki bahaaren

    aur jis sanam ke tan mein joDa hai zafrani

    gulnar ya gulabi ya zard surKH dhani

    kuchh husn ki chaDhai aur kuchh nai jawani

    jhulon mein jhulte hain upar paDe hai pani

    kya kya machi hain yaro barsat ki bahaaren

    koi to jhulne mein jhule ki Dor chhoDe

    ya sathiyon mein apne panw se panw joDe

    baadal khaDe hain sar par barse hain thoDe thoDe

    bundon mein bhigte hain lal aur gulabi joDe

    kya kya machi hain yaro barsat ki bahaaren

    kitnon ko ho rahi hai us aish ki nishani

    sote hain sath jis ke kahti hai wo siyani

    is waqt tum na jao ai mere yar-e-jaani

    dekho to kis maze se barse hai aaj pani

    kya kya machi hain yaro barsat ki bahaaren

    kitne sharab pi kar ho mast chhak rahe hain

    mai ki gulabi aage pyale chhalak rahe hain

    hota hai nach ghar ghar ghunghru jhanak rahe hain

    paDta hai meinh jhaDa-jhaD table khaDak rahe hain

    kya kya machi hain yaro barsat ki bahaaren

    hain jin ke tan mulaem maide ki jaise loi

    wo is hawa mein KHasi oDhe phire hain loi

    aur jin ki muflisi ne sharm-o-haya hai khoi

    hai un ke sar pe sar ki ya boriye ki khoi

    kya kya machi hain yaro barsat ki bahaaren

    kitne phire hain oDhe pani mein surKH paTTu

    jo dekh surKH badli hoti hai un pe laTTu

    kitnon ki gaDi rath hain kitnon ke ghoDe TaTTu

    jis pas kuchh nahin hai wo hum sa hai nikhaTTu

    kya kya machi hain yaro barsat ki bahaaren

    jo is hawa mein yaro daulat mein kuchh baDhe hain

    hai un ke sar pe chhatri hathi pe wo chaDhe hain

    hum se gharib ghoraba kichaD mein gir paDe hain

    hathon mein jutiyan hain aur paenche chaDhe hain

    kya kya machi hain yaro barsat ki bahaaren

    hai jin kane muhayya pakka pakaya khana

    un ko palang pe baiThe jhaDiyon ka KHat uDana

    hai jin ko apne ghar mein yan lon tel lana

    hai sar pe un ke pankha ya chhaj hai purana

    kya kya machi hain yaro barsat ki bahaaren

    kitne KHushi se baiThe khate hain KHush mahal mein

    kitne chale hain lene baniye se qarz pal mein

    kandhe pe dal aaTa haldi girah ne mal mein

    hathon mein ghi ki pyali aur lakDiyan baghal mein

    kya kya machi hain yaro barsat ki bahaaren

    jo kasbiyan jawanen husnon mein purtiyan hain

    sinon mein lal angiyan aur lal kurtiyan hain

    nazren bhi badliyan hain dil mein bhi surtiyan hain

    ek ek nigah mein kafir bijli ki phurtiyan hain

    kya kya machi hain yaro barsat ki bahaaren

    jo naujawan hain un ki tayyariyan baDi hain

    hathon mein lal chhaDiyan koThon pe wo khaDi hain

    aur wo jo aashna se jhagDi hain ya laDi hain

    munh ko chhupa palang par machli hui paDi hain

    kya kya machi hain yaro barsat ki bahaaren

    koi apne aashna se kar naz ka jhapaTTa

    kahti hai hans ke kafir chuTki le ya nihaTTa

    tum se to dil hamara ab ho gaya hai khaTTa

    tum aaj bhi na lae ranwa mera dupaTTa

    kya kya machi hain yaro barsat ki bahaaren

    kahti hain koi mujh ko joDa soha bana do

    ya TaT bafi juta ya kafsh-e-surKH la do

    koi kahe hai meri kurti abhi ranga do

    ya garm se andarse ek sair bhar manga do

    kya kya machi hain yaro barsat ki bahaaren

    jo un ke mubtala hain sab chiz la rahe hain

    kurti bana rahe hain angiya ranga rahe hain

    jo jo hain un ki baaten sab kuchh uTha rahe hain

    bahen gale mein Dale ishrat mana rahe hain

    kya kya machi hain yaro barsat ki bahaaren

    kitnon ne qaul bandha mamuli de ke paise

    kahte hain shad ho kar yun apne aashna se

    barsat-bhar to mil ke sunte ho jaan pyare

    ahmaq ho jo palang se ab mutne ko utre

    kya kya machi hain yaro barsat ki bahaaren

    ye sun ke un se hans hans kahti hai shoKH ranDi

    mamuli ab to le kar bandi bhi hai ghamanDi

    hum pahnen lal joDa tum pahno KHasi banDi

    KHandi ho jo tumhaari chhati kare na ThanDi

    kya kya machi hain yaro barsat ki bahaaren

    zardar ki to un mein hai bichh rahi palangaDi

    dilbar pari si baiThi jhamkae chuDi nibagaDi

    muflis ki TuTi paTTi ya TaT ki jhalangaDi

    ranDi mili to kali ya kunji luli langDi

    kya kya machi hain yaro barsat ki bahaaren

    kurti gulabi jin mein goTe lage hue hain

    angiyan ke gard jhuTe goTe Take hue hain

    kahti hain un se hans hans jo jo kaTe hue hain

    la ab to mere tujh par barah Take hue hain

    kya kya machi hain yaro barsat ki bahaaren

    jo begami hai ghar mein aaram kar rahi hai

    pardon mein doston se paigham kar rahi hai

    chitwan lawaTon se sau dam kar rahi hai

    chupke hi chupke apna sab kaam kar rahi hai

    kya kya machi hain yaro barsat ki bahaaren

    kahta hai koi apne mahbub sim-bar se

    wo is meinh mein na jao pyare hamare barse

    koi kahe hai apne dildar-e-KHush-nazar se

    hathon se mere jaani kha le ye do andarse

    kya kya machi hain yaro barsat ki bahaaren

    kahta hai koi pyari jo kuchh kaho sau la den

    zar-dozi TaT-bafi juta kaho pahna den

    peDa jalebi laDDu jo khao so manga den

    chira dupaTTa jama jaisa kaho ranga den

    kya kya machi hain yaro barsat ki bahaaren

    jin dilbaron ke tan par hain garmi dane aale

    kahte hain un ko aashiq yun pyar se bula le

    kya meinh baras raha hai pyare zara naha le

    chhati nahin to pyare Tuk piTh hi mila le

    kya kya machi hain yaro barsat ki bahaaren

    is rut mein hain jahan tak gulzar bhigte hain

    shahr-o-dayar kuche bazar bhigte hain

    sahra-o-jhaD buTe kohsar bhigte hain

    aashiq naha rahe hain dildar bhigte hain

    kya kya machi hain yaro barsat ki bahaaren

    kahti hai jab wo sun kar ye baat bhig ahmaq

    marungi tere aa kar ek lat bhig ahmaq

    mujh ko bhi zid chaDhi hai din-raat bhig ahmaq

    yunhi to ab ke sari barsat bhig ahmaq

    kya kya machi hain yaro barsat ki bahaaren

    zardar ki to sun kar aawaz wo pari-ru

    kahti hai launDiyon se jaldi kiwaD kholo

    muflis koi pukare to is se kahti hai wo

    hargiz koi na bolo ahmaq ko bhigne do

    kya kya machi hain yaro barsat ki bahaaren

    koi yar se kahe hai ai dil-sitan aao

    badli baDi uThi hai kahne ko man aao

    kya meinh baras raha hai har ek makan aao

    raaten andheriyan hain ai meri jaan aao

    kya kya machi hain yaro barsat ki bahaaren

    koi raat ko pukare pyare main bhigti hun

    kya teri ulfaton ke mare main bhigti hun

    aai hun teri KHatir aa re main bhigti hun

    kuchh to taras tu mera kha re main bhigti hun

    kya kya machi hain yaro barsat ki bahaaren

    koi pukarti hai dil saKHt bhigti hun

    kanpe hai meri chhati yak-laKHt bhigti hun

    kapDe bhi tar-ba-tar hain aur saKHt bhigti hun

    jaldi bula le mujh ko kambaKHt bhigti hun

    kya kya machi hain yaro barsat ki bahaaren

    shisha kahin gulabi botal jhamak rahi hai

    rabil motiya ki KHushbu mahak rahi hai

    chhati se chhati lag kar ishrat chhalak rahi hai

    pae khaTak rahe hain paTTi chaTak rahi hai

    kya kya machi hain yaro barsat ki bahaaren

    koi pukarti hai kya kya mujhe bhigoya

    koi pukarti hai kaisa mujhe bhigoya

    nahaq qarar kar ke jhuTa mujhe bhigoya

    yun dur se bula kar achchha mujhe bhigoya

    kya kya machi hain yaro barsat ki bahaaren

    jin dilbaron ki KHatir bhige hain jin ke joDe

    wo dekh un ki ulfat hote hain thoDe thoDe

    le un ke bhige kapDe hathon mein dhar nichoDe

    chira koi sungawe jama koi nichoDe

    kya kya machi hain yaro barsat ki bahaaren

    kichaD se ho rahi hai jis ja zamin phisalni

    mushkil hui hai wan se har ek ko rah chalni

    phisla jo panw pagDi mushkil hai phir sambhalni

    joti giri to wan se kya tab phir nikli

    kya kya machi hain yaro barsat ki bahaaren

    kitne to कीचड़ों ki daldal mein phans rahe hain

    kapDe tamam gandi daldal mein bas rahe hain

    kitne uThe hain marmar kitne ukas rahe hain

    wo dukh mein phans rahe hain aur log hans rahe hain

    kya kya machi hain yaro barsat ki bahaaren

    kahta hai koi gir kar ye ai KHudae lijo

    koi Dagmaga ke har-dam kahta hai wae lijo

    koi hath uTha pukare mujh ko bhi hae lijo

    koi shor kar pukare girne na pae lijo

    kya kya machi hain yaro barsat ki bahaaren

    gir kar kisi ke kapDe daldal mein hain moattar

    phisla koi kisi ka kichaD mein munh gaya bhar

    ek do nahin phisalte kuchh is mein aan aksar

    hote hain saikDon ke sar niche panw upar

    kya kya machi hain yaro barsat ki bahaaren

    ye rut wo hai ki jis mein KHurd-o-kabir KHush hain

    adna gharib muflis shah-o-wazir KHush hain

    mashuq shad-o-KHurram aashiq asir KHush hain

    jitne hain ab jahan mein sab ai 'nazir' KHush hain

    kya kya machi hain yaro barsat ki bahaaren

    0
    COMMENTS
    VIEW COMMENTS

    Additional information available

    Click on the INTERESTING button to view additional information associated with this sher.

    OKAY

    About this sher

    Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.

    Close

    rare Unpublished content

    This ghazal contains ashaar not published in the public domain. These are marked by a red line on the left.

    OKAY