basti

khulī āñkhoñ se duniyā kā tamāshā dekhte rahnā

zabāñ se kuchh nahīñ kahnā

tavāf-e-rā.egāñ kī ādateñ bhī ab purānī haiñ

yaqīñ-āsār ghaḌiyāñ bhī tasarruf meñ nahīñ mere

inhī āñkhoñ ke ik goshe meñ sat-range suhāne ḳhvāb rakkhe haiñ

kahīñ aadhī rifāqat kī kasak ne ghar banāyā hai

kahīñ takmīl kī ḳhvāhish

kisī sang-e-girāñ ke aks kī sūrat mujhe be-chain rakhtī hai

kahīñ ranj-o-alam ke zard lamhe kasmasā kar baiTh rahte haiñ

yahāñ ḳhūñ-bār manzar bhī ka.ī barsoñ se Thahre haiñ

ye āñkheñ haiñ ki koī ḳhānamāñ-barbād bastī hai

maiñ ab in kī hifāzat kar nahīñ saktī

so maiñ ne apnī āñkheñ aaj nīlāmī meñ rakh dī haiñ

khuli aankhon se duniya ka tamasha dekhte rahna

zaban se kuchh nahin kahna

tawaf-e-raegan ki aadaten bhi ab purani hain

yaqin-asar ghaDiyan bhi tasarruf mein nahin mere

inhi aankhon ke ek goshe mein sat-range suhane KHwab rakkhe hain

kahin aadhi rifaqat ki kasak ne ghar banaya hai

kahin takmil ki KHwahish

kisi sang-e-giran ke aks ki surat mujhe be-chain rakhti hai

kahin ranj-o-alam ke zard lamhe kasmasa kar baiTh rahte hain

yahan KHun-bar manzar bhi kai barson se Thahre hain

ye aankhen hain ki koi KHanaman-barbaad basti hai

main ab in ki hifazat kar nahin sakti

so main ne apni aankhen aaj nilami mein rakh di hain