bata ai man

sajā.īñ teġh kī dhāroñ pe gardaneñ kis ne

lahū se top ke sho'loñ ko kis ne sard kiyā

rag-e-gulū se kiyā tang kis ne halqa-e-dār

qudūm-e-‘azm se kaaTī thiiñ beḌiyāñ kis ne

amīr-e-qāfila-e-nāz-e-eqtidār hai kaun

shahīd kaun mujāvir sar-e-mazār hai kaun

vo jis ne apne chahītoñ ke sar qalam dekhe

vo jis ne lāDloñ ko daar par khiñchā paayā

vo jis ne qaid meñ kholā mahāz-e-āzādī

vo apne taḳht ko qurbān kar diyā jis ne

ki jis ne ġhair se asrār kā kiyā saudā

ki jis ne qaum ke hisse kī roTiyāñ khā liiñ

ki jis ne ḳhuun bahāyā ‘adam-tashaddud kā

ki jis ne zo'm-e-siyāsat meñ qatl-e-'ām kiyā

ki vo jo qatl huā bar-binā-e-jurm-e-vafā

ki vo jo likhtā rahā apne ḳhuuñ se naġhma-e-amn

ki vo jo ‘azmat-e-qaumī kā pāsdār rahā

ki vo jo bhūkā rahā aur jo bikā bhī nahīñ

zalīl kaun hai terī nazar meñ ḳhvār hai kaun

batā de maañ tirī mamtā kā qarz-dār hai kaun

sajain tegh ki dhaaron pe gardanen kis ne

lahu se top ke sho'lon ko kis ne sard kiya

rag-e-gulu se kiya tang kis ne halqa-e-dar

qudum-e-‘azm se kaTi thin beDiyan kis ne

amir-e-qafila-e-naz-e-eqtidar hai kaun

shahid kaun mujawir sar-e-mazar hai kaun

wo jis ne apne chahiton ke sar qalam dekhe

wo jis ne laDlon ko dar par khincha paya

wo jis ne qaid mein khola mahaz-e-azadi

wo apne taKHt ko qurban kar diya jis ne

ki jis ne ghair se asrar ka kiya sauda

ki jis ne qaum ke hisse ki roTiyan kha lin

ki jis ne KHun bahaya ‘adam-tashaddud ka

ki jis ne zo'm-e-siyasat mein qatl-e-'am kiya

ki wo jo qatl hua bar-bina-e-jurm-e-wafa

ki wo jo likhta raha apne KHun se naghma-e-amn

ki wo jo ‘azmat-e-qaumi ka pasdar raha

ki wo jo bhuka raha aur jo bika bhi nahin

zalil kaun hai teri nazar mein KHwar hai kaun

bata de man teri mamta ka qarz-dar hai kaun