be-chaara sher

mariyam ne ḳhvāb dekhā

jangal meñ hai vo tanhā

itne meñ jhāḌiyoñ se

ik sher jhaT se niklā

dekhī jo shakl us kī

mariyam pe ḳhauf chhāyā

bechārī jī meñ sahmī

ab sher mujh pe jhapTā

par sher kā to us dam

kuchh aur hī thā naqsha

thā vo bahut pareshāñ

sahmā sā aur Darā sā

laTkī huī thī gardan

utrā huā thā chehra

āñkhoñ meñ us kī aañsū

jo dum se poñchhtā thā

mariyam ko dekh kar ye

behad huā achambhā

Dhāras bañdhī jo us kī

mariyam ne us se pūchhā

ai bādshah salāmat

hai haal aap kā kyā

tab us ne jhurjhurī lī

mariyam kī samt palTā

pahle dikhā.e panje

kholā phir apnā jabḌā

kuchh der chup rahā vo

phir aah bhar ke bolā

kyā pūchhtī ho mujh se

ai merī nannhī guḌiyā

bigḌā mirā muqaddar

phūTā mirā nasība

yā bad-duā hai us kī

maiñ ne jise satāyā

mujh meñ rahe na kuchh gun

ab daañt haiñ na nāḳhun

mariyam ne KHwab dekha

jangal mein hai wo tanha

itne mein jhaDiyon se

ek sher jhaT se nikla

dekhi jo shakl us ki

mariyam pe KHauf chhaya

bechaari ji mein sahmi

ab sher mujh pe jhapTa

par sher ka to us dam

kuchh aur hi tha naqsha

tha wo bahut pareshan

sahma sa aur Dara sa

laTki hui thi gardan

utra hua tha chehra

aankhon mein us ki aansu

jo dum se ponchhta tha

mariyam ko dekh kar ye

behad hua achambha

Dhaaras bandhi jo us ki

mariyam ne us se puchha

ai baadshah salamat

hai haal aap ka kya

tab us ne jhurjhuri li

mariyam ki samt palTa

pahle dikhae panje

khola phir apna jabDa

kuchh der chup raha wo

phir aah bhar ke bola

kya puchhti ho mujh se

ai meri nannhi guDiya

bigDa mera muqaddar

phuTa mera nasiba

ya bad-dua hai us ki

main ne jise sataya

mujh mein rahe na kuchh gun

ab dant hain na naKHun