be-ghari

ḳhvāb kī saltanat se udhar

ik jahāñ hai jise aañkh ābād kar le to kar le

vahāñ saa.e hī saa.e haiñ

aksar o besh-tar dhuup meñ raqs karte hue

rezgārī kī āvāz par dhaḌkaneñ taal detī haiñ to jhilmilāte haiñ

āñkhoñ meñ ḳhvāb

(apnā ghar us ke dār-ul-ḳhilāfe meñ hai)

sub.h se shaam tak

note gintī huī uñgliyāñ yuuñ thiraktī haiñ

jaise tamannāoñ ko thapkiyāñ de shab-e-hijr meñ ek birhan kā dil

roz ḳhvāboñ kī pūñjī meñ sikkoñ ke girne se ik guuñj uThtī hai

goyā kahīñ Tiin kī chhat pe bārish ke qatre paḌeñ

roz ik ghar tamannā ke malbe se āñkhoñ ke pātāl meñ jhāñktā hai

vahī be-gharī be-zamīnī kā dukh aaj tak mujh ko ghere hue hai

maiñ chāñd aur sūraj kī sūrat falak-dar-falak tairtā huuñ

mire ḳhvāb mujh ko uḌaa.e liye jā rahe haiñ

maiñ pāmāl hotī huī aarzū meñ kahāñ tak jiyūñgā

KHwab ki saltanat se udhar

ek jahan hai jise aankh aabaad kar le to kar le

wahan sae hi sae hain

aksar o besh-tar dhup mein raqs karte hue

rezgari ki aawaz par dhaDkanen tal deti hain to jhilmilate hain

aankhon mein KHwab

(apna ghar us ke dar-ul-KHilafe mein hai)

subh se sham tak

note ginti hui ungliyan yun thirakti hain

jaise tamannaon ko thapkiyan de shab-e-hijr mein ek birhan ka dil

roz KHwabon ki punji mein sikkon ke girne se ek gunj uThti hai

goya kahin Tin ki chhat pe barish ke qatre paDen

roz ek ghar tamanna ke malbe se aankhon ke patal mein jhankta hai

wahi be-ghari be-zamini ka dukh aaj tak mujh ko ghere hue hai

main chand aur suraj ki surat falak-dar-falak tairta hun

mere KHwab mujh ko uDae liye ja rahe hain

main pamal hoti hui aarzu mein kahan tak jiyunga