be-hunar saaton mein ek sawal

nuzūl-e-kashf kī rah meñ safed darvāze

qadam-burīda-musāfir se pūchhte hī rahe

tire safar meñ to ujle dinoñ kī bārish thī

tirī nigāhoñ meñ ḳhufta dhanak ne karvaT lī

balā kī niind meñ bhī haath jāgte the tire

tamām pahlū masāfat ke sāmne the tire

tirī gavāhī pe to phuul phalne lagte the

tire hī saath vo manzar bhī chalne lagte the

Thahar ga.e the jo bām-e-zavāl par ik din

hañse the khul ke jo ahd-e-kamāl par ik din

tire junūñ pe qayāmat guzar ga.ī kaise

riyāzatoñ kī vo rut be-samar ga.ī kaise

nuzul-e-kashf ki rah mein safed darwaze

qadam-burida-musafir se puchhte hi rahe

tere safar mein to ujle dinon ki barish thi

teri nigahon mein KHufta dhanak ne karwaT li

bala ki nind mein bhi hath jagte the tere

tamam pahlu masafat ke samne the tere

teri gawahi pe to phul phalne lagte the

tere hi sath wo manzar bhi chalne lagte the

Thahar gae the jo baam-e-zawal par ek din

hanse the khul ke jo ahd-e-kamal par ek din

tere junun pe qayamat guzar gai kaise

riyazaton ki wo rut be-samar gai kaise