be-irada zist kije

akelā-pan parinde kā

parinde kā akelā-pan

samā.at-gāh-e-vīrānī meñ bulbul boltī hai

akelā-pan gaḌriye kā

kisī saada gaḌriye kā akelā-pan

vo is shab bheḌiyoñ ke darmiyāñ tanhā nahīñ hogā

akelā-pan musāfir kā

kisī bhūle musāfir kā akelā-pan

musāfir quvvat-e-parvāz se majbūr hai

aage nikal jaatā hai

sāhil par parinde ghaas par TuuTe hue par dekhte haiñ

musāfir ke darmiyāñ tanhā nahīñ hogā

akelā-pan sitāre kā

sitāre kā akelā-pan

sitāra TūTtā hai raakh ho jaatā hai

miTTī sab chhupā letī hai

miTTī meñ koī tanhā nahīñ hotā

fanā ta.amīl dars-e-be-ḳhudī hai

be-irāda ziist kiije

be-taqāzā pā.iye

kūcha-e-bint-e-sarā-e-dahr meñ chaliye kabhī sar-salāmat aa.iye

aur ik raqs-e-fanā ta.amīl dars-e-be-ḳhudī

chūñtīyoñ ke darmiyāñ bheḌiyoñ ke darmiyāñ

miTTiyoñ ke silsiloñ ke darmiyāñ raqs-e-fanā

be-irāda ziist kiije

akela-pan parinde ka

parinde ka akela-pan

samaat-gah-e-virani mein bulbul bolti hai

akela-pan gaDriye ka

kisi sada gaDriye ka akela-pan

wo is shab bheDiyon ke darmiyan tanha nahin hoga

akela-pan musafir ka

kisi bhule musafir ka akela-pan

musafir quwwat-e-parwaz se majbur hai

aage nikal jata hai

sahil par parinde ghas par TuTe hue par dekhte hain

musafir ke darmiyan tanha nahin hoga

akela-pan sitare ka

sitare ka akela-pan

sitara TuTta hai rakh ho jata hai

miTTi sab chhupa leti hai

miTTi mein koi tanha nahin hota

fana tamil dars-e-be-KHudi hai

be-irada zist kije

be-taqaza paiye

kucha-e-bint-e-sara-e-dahr mein chaliye kabhi sar-salamat aaiye

aur ek raqs-e-fana tamil dars-e-be-KHudi

chuntiyon ke darmiyan bheDiyon ke darmiyan

miTTiyon ke silsilon ke darmiyan raqs-e-fana

be-irada zist kije