be-sabab

aaj ye jī meñ mere aayā hai

kuchh zarā haT ke kahūñ

jis meñ junūñ ho shāmil

āsmānoñ kī taraf yuuñ hī takūñ

be-sabab hañs duuñ bigaḌ bhī jā.ūñ

sab kī nazroñ meñ zarūrī jo hai

be-niyāzī se use dekh kar aage baḌh jā.ūñ

ġhair logoñ se milūñ aur dikhā.ūñ maiñ tapāk

āshnā log mileñ to zarā katrā jā.ūñ

log kahne lageñ kyā haal huā hai is kā

koī sadma hai junūñ hai ki dikhāvā hai faqat

ab talak lagtā thā ye shaḳhs baḌā suljhā sā

aise māhaul meñ kuchh kahnā baḌā mushkil hai

ghar kī chintā hai ise yā hai zamāne kī fikr

kuchh na kuchh baat hai varna ye taġhayyur kaisā

koī bhī baat bilā-vaj.h nahīñ ho saktī

sab lagāte raheñ kuchh apne tarīqe se qayās

apne maḳhsūs tajrabe se huā ho jo gumāñ

aur ye dekh ke maiñ ḳhuub hañsūñ aur sochūñ

be-sabab bhī ka.ī hote haiñ amal

har kisī baat kā matlab to nahīñ hotā hai

aaj ye ji mein mere aaya hai

kuchh zara haT ke kahun

jis mein junun ho shamil

aasmanon ki taraf yun hi takun

be-sabab hans dun bigaD bhi jaun

sab ki nazron mein zaruri jo hai

be-niyazi se use dekh kar aage baDh jaun

ghair logon se milun aur dikhaun main tapak

aashna log milen to zara katra jaun

log kahne lagen kya haal hua hai is ka

koi sadma hai junun hai ki dikhawa hai faqat

ab talak lagta tha ye shaKHs baDa suljha sa

aise mahaul mein kuchh kahna baDa mushkil hai

ghar ki chinta hai ise ya hai zamane ki fikr

kuchh na kuchh baat hai warna ye taghayyur kaisa

koi bhi baat bila-wajh nahin ho sakti

sab lagate rahen kuchh apne tariqe se qayas

apne maKHsus tajrabe se hua ho jo guman

aur ye dekh ke main KHub hansun aur sochun

be-sabab bhi kai hote hain amal

har kisi baat ka matlab to nahin hota hai