Belladonna!

usī jagah se dhundlāyā hai har ā.īna

jahāñ-jahāñ par aks ThiThak kar Thahar gayā hai

ek darāḌ sī ug aa.ī hai

us ke pīchhe phailtā sūraj

sahm ke shabnam kī narmī meñ rasta DhūñDne nikal paḌā hai

palkoñ par se qatra qatra bahtā sāgar

khiñchte khiñchte puure falak par phail gayā hai

aur simaT kar ka.ī lakīreñ bah niklī haiñ

aise jaise shahr kī galiyāñ

rassī ke bal khāte TukḌe

ek aziim masāfat ke sailāb meñ pal pal Duub rahe haiñ

dast-e-falak se kaT kar girte sab ḳhvāboñ kā

aks rukā hai

ā.īne meñ aadhe so.e so.e sitāre

niiñd ke gahre gaḌhe meñ utre jaate haiñ

jo pathrā.ī aañkh meñ jam kar bhī paanī se bharā huā hai

usi jagah se dhundlaya hai har aaina

jahan-jahan par aks ThiThak kar Thahar gaya hai

ek daraD si ug aai hai

us ke pichhe phailta suraj

sahm ke shabnam ki narmi mein rasta DhunDne nikal paDa hai

palkon par se qatra qatra bahta sagar

khinchte khinchte pure falak par phail gaya hai

aur simaT kar kai lakiren bah nikli hain

aise jaise shahr ki galiyan

rassi ke bal khate TukDe

ek azim masafat ke sailab mein pal pal Dub rahe hain

dast-e-falak se kaT kar girte sab KHwabon ka

aks ruka hai

aaine mein aadhe soe soe sitare

nind ke gahre gaDhe mein utre jate hain

jo pathrai aankh mein jam kar bhi pani se bhara hua hai