bhiD

kahīñ ye vo bhiiḌ to nahīñ hai

ki jo daraḳhtoñ meñ zinda nabiyoñ ko kāTtī thī

jo vaqt-e-taslīb-e-ibn-e-mariyam tamāsh-bīñ thī

jo aag meñ pheñke jaane vaale

ḳhalīl-e-yazdāñ pe hañs rahī thī

jo saur kī ġhaar tak nabī ko

shahīd karne chalī ga.ī thī

jo shahr-e-tā.ef meñ sang uThā.e

nabī ko zaḳhmoñ se bhar rahī thī

jo karbalā meñ husain ke sar ko neze par rakh ke

ghūmtī thī

ye bhiiḌ vaisī hī lag rahī hai

ye bhiiḌ dā've to kar rahī hai

ik aise insāñ kī pairvī ke

jo apne dushman pe mehrbāñ thā

agar kahīñ koī kuuḌā pheñke to muskurātā

agar ḳhudā bhī kahe ki taa.ef ke sang-bāroñ ko bad-du'ā do

to vo unheñ bhī du'ā.eñ detā

jo fat.h paatā to shahr bhar kī sabhī ḳhatā.eñ mu'āf kartā

jo qatl karne ko DhūñDte the unheñ bulā kar gale lagātā

ye bhiiḌ dā've hī kar rahī hai

ye bhiiḌ logoñ ko mārtī hai

ye be-gunāhoñ ko kāTtī hai

ye masḳh kartī hai laash tak ko

ye kis payambar kī pairvī hai

ye kis ḳhudā ne kahā huā hai

maiñ dekhtā huuñ to sochtā huuñ

ye bhiiḌ jis meñ

hazāroñ rapist

lākhoñ rāshī

karoḌoñ jhūTe chhupe hue haiñ

kahīñ ye vo bhiiḌ to nahīñ hai

ki jo daraḳhtoñ meñ zinda nabiyoñ ko kāTtī thī

kahin ye wo bhiD to nahin hai

ki jo daraKHton mein zinda nabiyon ko kaTti thi

jo waqt-e-taslib-e-ibn-e-mariyam tamash-bin thi

jo aag mein phenke jaane wale

KHalil-e-yazdan pe hans rahi thi

jo saur ki ghaar tak nabi ko

shahid karne chali gai thi

jo shahr-e-taef mein sang uThae

nabi ko zaKHmon se bhar rahi thi

jo karbala mein husain ke sar ko neze par rakh ke

ghumti thi

ye bhiD waisi hi lag rahi hai

ye bhiD da'we to kar rahi hai

ek aise insan ki pairwi ke

jo apne dushman pe mehrban tha

agar kahin koi kuDa phenke to muskuraata

agar KHuda bhi kahe ki taef ke sang-baron ko bad-du'a do

to wo unhen bhi du'aen deta

jo fath pata to shahr bhar ki sabhi KHataen mu'af karta

jo qatl karne ko DhunDte the unhen bula kar gale lagata

ye bhiD da'we hi kar rahi hai

ye bhiD logon ko marti hai

ye be-gunahon ko kaTti hai

ye masKH karti hai lash tak ko

ye kis payambar ki pairwi hai

ye kis KHuda ne kaha hua hai

main dekhta hun to sochta hun

ye bhiD jis mein

hazaron rapist

lakhon rashi

karoDon jhuTe chhupe hue hain

kahin ye wo bhiD to nahin hai

ki jo daraKHton mein zinda nabiyon ko kaTti thi