bhopal

badr-e-kāmil hai sitāroñ kī ridā bhopal hai

ik hasīñ ke dast-e-nāzuk kī hinā bhopal hai

chāhe jis ruḳh se bhī dekheñ ḳhushnumā bhopal hai

sach to ye hai ab bhī faḳhr-e-mālvā bhopal hai

duur tak phaile pahāḌī silsiloñ ke zer-o-bam

jaise ik mauj-e-talātum par basā bhopal hai

is ke tālāboñ meñ jaise shaam sonā ghol de

sub.h jaise ek chāñdī kī qabā bhopal hai

sochiye to reshmī āñchal sā lahrātā huā

dekhiye to sabz pattoñ se ghirā bhopal hai

jis ne is kā husn dekhā is kā dīvāna huā

sach to ye hai aaj bhī kāfir adā bhopal hai

ḳhushk peḌoñ par bhī rahtī haiñ yahāñ shādābiyāñ

jaane kin hoñToñ kī māñgī ik du'ā bhopal hai

shā'irī ho 'ilm-o-hikmat ho ki ho bazm-e-tarab

silsila dar silsila dar silsila bhopal hai

guftugū she'r-o-adab par dostoñ kī mahfileñ

shahar meñ gar ye na hoñ to be-mazā bhopal hai

hind ke naqshe pe ik ḳhitta numāyāñ dekh kar

us ne pūchhā kyā hai ye maiñ ne kahā bhopal hai

maiñ kabhī thā kānpurī thā kabhī sandelvī

ab to muddat se 'ziyā' merā pata bhopal hai

badr-e-kaamil hai sitaron ki rida bhopal hai

ek hasin ke dast-e-nazuk ki hina bhopal hai

chahe jis ruKH se bhi dekhen KHushnuma bhopal hai

sach to ye hai ab bhi faKHr-e-malwa bhopal hai

dur tak phaile pahaDi silsilon ke zer-o-bam

jaise ek mauj-e-talatum par basa bhopal hai

is ke talabon mein jaise sham sona ghol de

subh jaise ek chandi ki qaba bhopal hai

sochiye to reshmi aanchal sa lahraata hua

dekhiye to sabz patton se ghira bhopal hai

jis ne is ka husn dekha is ka diwana hua

sach to ye hai aaj bhi kafir ada bhopal hai

KHushk peDon par bhi rahti hain yahan shadabiyan

jaane kin honTon ki mangi ek du'a bhopal hai

sha'iri ho 'ilm-o-hikmat ho ki ho bazm-e-tarab

silsila dar silsila dar silsila bhopal hai

guftugu she'r-o-adab par doston ki mahfilen

shahar mein gar ye na hon to be-maza bhopal hai

hind ke naqshe pe ek KHitta numayan dekh kar

us ne puchha kya hai ye main ne kaha bhopal hai

main kabhi tha kanpuri tha kabhi sandelwi

ab to muddat se 'ziya' mera pata bhopal hai