bichhaD chuke hain

so tai huā ki bichhaḌ chuke haiñ

faqat dikhāvā haiñ sard aa.heñ

jo aag donoñ taraf barābar lagī huī thī

vo bujh chukī hai

ukhaḌ chukā hai vo saañs jis se

hayāt the rābte hamāre

judā haiñ ab rāste hamāre

masāfateñ ḳhatm ho chukī haiñ

barā.e-duniyā hai rāh-gardī

muravvatan haiñ muravvateñ bhī

ye haath hāthoñ meñ jānte ho kahāñ talak hai

hisāb-e-sūd-o-ziyāñ talak hai

haiñ muntazir ab ki kab koī aisā moḌ aa.e

ki bār-e-ilzām-e-bevafā.ī koī uThā.e

jo muskurāhaT hamāre chehre ko dekh kar un laboñ pe aatī

jabīñ kī shiknoñ meñ Dhal chukī hai

vo hoñT jin pe hamāre bosoñ se surḳhiyāñ thiiñ

vo hoñT shikvoñ se aT chuke haiñ

ham ek donoñ meñ baT chuke haiñ

to tai huā ki bichhaḌ chuke haiñ

so tai hua ki bichhaD chuke hain

faqat dikhawa hain sard aahen

jo aag donon taraf barabar lagi hui thi

wo bujh chuki hai

ukhaD chuka hai wo sans jis se

hayat the rabte hamare

juda hain ab raste hamare

masafaten KHatm ho chuki hain

barae-duniya hai rah-gardi

murawwatan hain murawwaten bhi

ye hath hathon mein jaante ho kahan talak hai

hisab-e-sud-o-ziyan talak hai

hain muntazir ab ki kab koi aisa moD aae

ki bar-e-ilzam-e-bewafai koi uThae

jo muskurahaT hamare chehre ko dekh kar un labon pe aati

jabin ki shiknon mein Dhal chuki hai

wo honT jin pe hamare boson se surKHiyan thin

wo honT shikwon se aT chuke hain

hum ek donon mein baT chuke hain

to tai hua ki bichhaD chuke hain