blood cancer

ye un zamānoñ kī dāstāñ hai

ki jab ḳhirad ke kasīf panjoñ ne mere sumbul paroñ meñ nāḳhun nahīñ khubo.e the

un zamānoñ meñ sapne sāñpoñ ke bil nahīñ the

anant naagā kī jhaḌtī chamḌī sañpoliyoñ kā ḳhudā nahīñ thī

gagan kā kesar giddhoñ kā luqma nahīñ banā thā

hamāre sūrat-garoñ ne ulTe amiiq ġhāroñ ko siidh dete

palīd chamgādaḌoñ kā chehra nahīñ takā thā

agarche cancer ke zard kiiḌe rajaz kī lai par thirak rahe the

maiñ apne dil kī lagām thāme

kulāh ḳhud meñ se jhāñktā thā

so merī nabzoñ ke hinhināne se zard kīḌoñ meñ ḳhauf qaa.em thā

par achānak

safed coatoñ meñ band sirinjoñ ne merī dhaḌkan pe kaan rakhe

yuuñ nesh dāñtoñ se mere kūlhe kī haDDiyoñ meñ naqab lagā.ī

ki shaah poras ke mast hāthī ne us kī faujoñ ko rauñd Daalā

safed ḳhaliyoñ ke shahsavāroñ ne shahbā duldul kī pairvī meñ

sipar uThā.ī

niyām se teġh ko nikālā

to zard kīḌoñ ne apne nezoñ pe ḳhūnī safhe uThā liye the

maiñ mar rahā huuñ sisak rahā huuñ

ye merā bistar

jahāñ meñ be-sudh paḌā huā huuñ

mirī chitā hai

so mere hāthoñ meñ mere bāloñ ke jalte guchchhe haiñ

mere Dhāñche ke raqs-e-āḳhir ko dekhne

ye siyāh kapḌoñ meñ kaun buḌhiyā haiñ

kyā baḌbaḌā rahī haiñ

inheñ uThāo

khajūr kī guThliyāñ haTāo

ye ḳhūnī thaile meñ kis kā ḳhuuñ hai

lahū ke qatroñ kā vird roko

ye vird āñtoñ ko kaaT khāte haiñ

aur masānoñ ko chaab jaate haiñ

ye raqs-e-āḳhir āḳhirī nahīñ hai

maiñ ik javālā-mukhī kā qissa huuñ

maiñ infijār-e-azīm kī tāqatoñ meñ zarra huuñ

maiñ milky way kī safed rāhoñ meñ zard sūraj ke āshiyāne meñ rahne vaalā

go jal rahā huuñ jalā nahīñ huuñ

maiñ mar rahā huuñ marā nahīñ huuñ

ye un zamanon ki dastan hai

ki jab KHirad ke kasif panjon ne mere sumbul paron mein naKHun nahin khuboe the

un zamanon mein sapne sanpon ke bil nahin the

anant naga ki jhaDti chamDi sanpoliyon ka KHuda nahin thi

gagan ka kesar giddhon ka luqma nahin bana tha

hamare surat-garon ne ulTe amiq ghaaron ko sidh dete

palid chamgadaDon ka chehra nahin taka tha

agarche cancer ke zard kiDe rajaz ki lai par thirak rahe the

main apne dil ki lagam thame

kulah KHud mein se jhankta tha

so meri nabzon ke hinhinane se zard kiDon mein KHauf qaem tha

par achanak

safed coaton mein band sirinjon ne meri dhaDkan pe kan rakhe

yun nesh danton se mere kulhe ki haDDiyon mein naqab lagai

ki shah poras ke mast hathi ne us ki faujon ko raund Dala

safed KHaliyon ke shahsawaron ne shahba duldul ki pairwi mein

sipar uThai

niyam se tegh ko nikala

to zard kiDon ne apne nezon pe KHuni safhe uTha liye the

main mar raha hun sisak raha hun

ye mera bistar

jahan mein be-sudh paDa hua hun

meri chita hai

so mere hathon mein mere baalon ke jalte guchchhe hain

mere Dhanche ke raqs-e-aKHir ko dekhne

ye siyah kapDon mein kaun buDhiya hain

kya baDbaDa rahi hain

inhen uThao

khajur ki guThliyan haTao

ye KHuni thaile mein kis ka KHun hai

lahu ke qatron ka wird roko

ye wird aanton ko kaT khate hain

aur masanon ko chab jate hain

ye raqs-e-aKHir aaKHiri nahin hai

main ek jawala-mukhi ka qissa hun

main infijar-e-azim ki taqaton mein zarra hun

main milky way ki safed rahon mein zard suraj ke aashiyane mein rahne wala

go jal raha hun jala nahin hun

main mar raha hun mara nahin hun