bulandi ki paimaish

jitne ūñche haiñ utne hī ḳhāmosh haiñ

kin pahāḌoñ meñ rahnā paḌā hai mujhe

saare apnī baḌā.ī kī dhun meñ magan

dekhte jā rahe haiñ magar baat karte nahīñ

baat karte haiñ to ḳhud se aage koī lafz kahte hahīñ!

apne hī bojh se

merī ḳhāmoshī kuuza kamar ho ga.ii... to chalī

ik baḌī ḳhāmushī kī taraf

aur marī nannhī sī ḳhāmushī ne kahā

dhartī ḳhāmosh hai

ye ḳhamoshī kā ghūñghaT uThā.e to maiñ is kī sāñseñ ginūñ

ai qadīmī ḳhamoshī!

jo tū aur maiñ chup kī chādar utāreñ

to dhartī takallum kā malbūs pahne

pahāḌoñ se aisī sadā.eñ uTheñ

jo samundar ke siine meñ sūrāḳh kar deñ

ye kuchlī huī ḳhalq uTThe

to chīḳhoñ se pātāl hilne lage

mauj-e-nāla ravānī kare

aur sīnoñ meñ sahmī sadāoñ kī barfoñ ko paanī kare

lafz-e-mamnua phir se chale

soch kī sarzamīñ par na.ī tuḳhm-kārī kare

ḳhair-o-shar kī hadoñ par na.ī had ko jaarī kare

ai baḌī ḳhāmushī!... ai...

magar ḳhāmushī pahle se baḌh kar ḳhāmosh thii!

dil ke ġhurfoñ meñ soī sadāo!

uTho! sūr-e-ādam uThāo

'sarāfīl' soyā paḌā hai

tumhī koī shor-e-qayāmat jagāo

uTho be-navāo!

tumhī apnī miTTī kī dhaḌkan meñ dhaḌkan milāo

tumhāre badan par hai ta.amīr jin kī

sadāoñ kī larzish se

un ūñche burjoñ ko mil kar zamīñ-bos kar do!

kisī ko nahīñ māntī haiñ

sadā.eñ, koī ūñchā nīchā nahīñ jāntī haiñ!

jitne unche hain utne hi KHamosh hain

kin pahaDon mein rahna paDa hai mujhe

sare apni baDai ki dhun mein magan

dekhte ja rahe hain magar baat karte nahin

baat karte hain to KHud se aage koi lafz kahte hahin!

apne hi bojh se

meri KHamoshi kuza kamar ho gai to chali

ek baDi KHamushi ki taraf

aur mari nannhi si KHamushi ne kaha

dharti KHamosh hai

ye KHamoshi ka ghunghaT uThae to main is ki sansen ginun

ai qadimi KHamoshi!

jo tu aur main chup ki chadar utaren

to dharti takallum ka malbus pahne

pahaDon se aisi sadaen uThen

jo samundar ke sine mein suraKH kar den

ye kuchli hui KHalq uTThe

to chiKHon se patal hilne lage

mauj-e-nala rawani kare

aur sinon mein sahmi sadaon ki barfon ko pani kare

lafz-e-mamnua phir se chale

soch ki sarzamin par nai tuKHm-kari kare

KHair-o-shar ki hadon par nai had ko jari kare

ai baDi KHamushi! ai

magar KHamushi pahle se baDh kar KHamosh thi!

dil ke ghurfon mein soi sadao!

uTho! sur-e-adam uThao

'sarafil' soya paDa hai

tumhi koi shor-e-qayamat jagao

uTho be-nawao!

tumhi apni miTTi ki dhaDkan mein dhaDkan milao

tumhaare badan par hai tamir jin ki

sadaon ki larzish se

un unche burjon ko mil kar zamin-bos kar do!

kisi ko nahin manti hain

sadaen, koi uncha nicha nahin jaanti hain!