burada uD raha hai

burāda uḌ rahā hai

tirmare se nāchte haiñ

dīda-e-namnāk meñ

burrāq saa.e reñgte haiñ

rāhdārī meñ

burāda uḌ rahā hai

naak ke nathune meñ

nalkī oxygen kī lagī hai

gosha-e-lab raal se luthḌā hai

hichkī sī bañdhī hai

ik ġhashī hai

merā hāzir mere ġhā.eb se judā hai

kyā batā.ūñ mājrā kyā hai!

zamānoñ qabl ham donoñ kā rasta

poTlī meñ maañ ke hāthoñ kā pakā khānā

kitābeñ aur basta ek the

kaḌiyoñ ke raḳhnoñ meñ

hamāre saath chiḌiyāñ

raat din bisrām kartī thiiñ

hamārī mushtarak chahkār thī

darzī se kapḌe ek jaise sil ke aate

ek se juute pahante

būñdā-bāndī meñ ikaTThe hī nahāte

ham jidhar jaate hamesha saath jaate

raat jab Dhaltī

to sunte the kahānī

sehn meñ rakkhe hue maTke kā paanī

peḌ kī chhatrī

sitāroñ se muzayyan āsmāñ

hāñDī kī ḳhushbū

aur varīdoñ kā lahū

al-muḳhtasar ḳhvāboñ kī duniyā ek thī

ik dūsre kā hāzir o ġhā.eb the

ham juḌvāñ the

a.azā o anāsir meñ duī nāpaid thī

siine se siina

dil se dil

māthe se māthā munsalik thaa!

kyā batā.ūñ

kis tarah bijlī lapak kar taar se niklī

kināre apnā dariyā chhoḌ kar ruḳhsat hue

takle kā dhāgā kis tarah TuuTā

sirhāne ḳhvāb jo rakkhe the

kab badle ga.e

ziina kidhar ko muḌ gayā

vo kaun sā sāmāñ thā

jis ke pheñkne par

dil to raazī thā

magar jis ke uThāne se kamar dukhtī na thī

kis dard kī parchhā.īñ thī

jo maz.har o shai se nikalnā chāhtī thī

dhund jo dīvār ke donoñ taraf thī

us kā qissa kyā sunā.ūñ!

kyā batā.ūñ

vaqt ne jab taḳhta-e-āhan pe rakh kar

tez-rau aarā chalāyā thā

hameñ TukḌoñ meñ kaaTā thā

usī din se burāda uḌ rahā hai

peḌ ke sūkhe tane se

chhat kī kaḌiyoñ se

kitāboñ aur ḳhvāboñ se

burāda uḌ rahā hai

merā hāzir mere ġhā.eb se judā hai!!

burada uD raha hai

tirmare se nachte hain

dida-e-namnak mein

burraq sae rengte hain

rahdari mein

burada uD raha hai

nak ke nathune mein

nalki oxygen ki lagi hai

gosha-e-lab ral se luthDa hai

hichki si bandhi hai

ek ghashi hai

mera hazir mere ghaeb se juda hai

kya bataun majra kya hai!

zamanon qabl hum donon ka rasta

poTli mein man ke hathon ka paka khana

kitaben aur basta ek the

kaDiyon ke raKHnon mein

hamare sath chiDiyan

raat din bisram karti thin

hamari mushtarak chahkar thi

darzi se kapDe ek jaise sil ke aate

ek se jute pahante

bunda-bandi mein ikaTThe hi nahate

hum jidhar jate hamesha sath jate

raat jab Dhalti

to sunte the kahani

sehn mein rakkhe hue maTke ka pani

peD ki chhatri

sitaron se muzayyan aasman

hanDi ki KHushbu

aur waridon ka lahu

al-muKHtasar KHwabon ki duniya ek thi

ek dusre ka hazir o ghaeb the

hum juDwan the

aaza o anasir mein dui napaid thi

sine se sina

dil se dil

mathe se matha munsalik tha!

kya bataun

kis tarah bijli lapak kar tar se nikli

kinare apna dariya chhoD kar ruKHsat hue

takle ka dhaga kis tarah TuTa

sirhane KHwab jo rakkhe the

kab badle gae

zina kidhar ko muD gaya

wo kaun sa saman tha

jis ke phenkne par

dil to raazi tha

magar jis ke uThane se kamar dukhti na thi

kis dard ki parchhain thi

jo mazhar o shai se nikalna chahti thi

dhund jo diwar ke donon taraf thi

us ka qissa kya sunaun!

kya bataun

waqt ne jab taKHta-e-ahan pe rakh kar

tez-rau aara chalaya tha

hamein TukDon mein kaTa tha

usi din se burada uD raha hai

peD ke sukhe tane se

chhat ki kaDiyon se

kitabon aur KHwabon se

burada uD raha hai

mera hazir mere ghaeb se juda hai!!