bu-ali andar-ghubar-e-naqa gum

maiñ agar shā.ir thā maulā to mirī ohda-barā.ī kyā thī āḳhir

shā.irī meñ mutakaffil thā to ye kaisī nā-munāsib ehtimālī

kyā karūñ maiñ

band kar duuñ apnā bāb-e-lafz-o-ma.anī

aur kahf ke ġhaar meñ jhāñkūñ jahāñ baiThe hue

as.hāb ma.abūd-e-haqīqī kī ibādat meñ magan haiñ

aur sag-e-tāzī sā chaukīdār un ke paas baiThūñ

vahdat-o-tauhīd kā paiġhām sun kar

vird kī sūrat use dohrātā jā.ūñ

pūchhtā huuñ

kyā mirī mashq-e-suḳhan tauhīd kī azalī shanāsā

o qarz ke bigtāshan kī daa.ī nahīñ hai

maiñ to rāsul-māl saarā peshgī hī de chukā huuñ

qarz kī vāpas adaa.ī meñ

mire alfāz kā saarā zaḳhīra luT chukā hai

sher ko harf-o-nidā meñ Dhālnā

tasbīh-o-tahlīl-o-ibādat se kahāñ kamtar hai maulā

shā.irī juzvest-az-paiġhambarī kis ne kahā thā

maiñ to itnā jāntā huuñ

merī tamjīd-o-parastish lafz kī qirāt meñ Dhaltī hai

to phir taḳhlīq kā vāzeh amal tasbīh yā maalā ke mankoñ kī tarah hai

phir ḳhayāl aatā hai shāyad maiñ ġhalat-āmoz huuñ

jo sher-goī ko ibādat jaan kar itrā rahā huuñ

bū-alī huuñ jo ġhubār-nāqa meñ gum ho gayā hai

main agar shair tha maula to meri ohda-barai kya thi aaKHir

shairi mein mutakaffil tha to ye kaisi na-munasib ehtimali

kya karun main

band kar dun apna bab-e-lafz-o-mani

aur kahf ke ghaar mein jhankun jahan baiThe hue

ashab mabud-e-haqiqi ki ibaadat mein magan hain

aur sag-e-tazi sa chaukidar un ke pas baiThun

wahdat-o-tauhid ka paigham sun kar

wird ki surat use dohraata jaun

puchhta hun

kya meri mashq-e-suKHan tauhid ki azali shanasa

o qarz ke bigtashan ki dai nahin hai

main to rasul-mal sara peshgi hi de chuka hun

qarz ki wapas adai mein

mere alfaz ka sara zaKHira luT chuka hai

sher ko harf-o-nida mein Dhaalna

tasbih-o-tahlil-o-ibaadat se kahan kamtar hai maula

shairi juzwest-az-paighambari kis ne kaha tha

main to itna jaanta hun

meri tamjid-o-parastish lafz ki qiraat mein Dhalti hai

to phir taKHliq ka wazeh amal tasbih ya mala ke mankon ki tarah hai

phir KHayal aata hai shayad main ghalat-amoz hun

jo sher-goi ko ibaadat jaan kar itra raha hun

bu-ali hun jo ghubar-naqa mein gum ho gaya hai