buDhi tawaif

zard chehre pe thiiñ

sharminda gulābī lahreñ

aañkh māyūs thī

barsoñ se nahīñ soī thī

koī aatā thā

koī aa ke chalā jaatā thā

koī ādāb

naman kar jaatā thā

pheñktā phuul thā

patthar koī

kankar koī

sīTiyāñ koī bajātā thā

guzar jaatā thā

gungunātā koī

rāhoñ meñ Thahar jaatā thā

sub.h ho jaatī thī āñkheñ yuuñ jhapakte us kī

guzrī rātoñ ke ta'āqub meñ lapakte us kī

kapkapāte hue hāthoñ se

ishāra kartī

rāhgīroñ ko kabhī

aañkh bhī maarā kartī

kāTtī lab vo kabhī

zulf sañvārā kartī

letī añgḌā.iyāñ

vo jism ubhārā kartī

ek hī kaam

musalsal vo

dubāra kartī

'umr is tarh se apnī vo

guzārā kartī

ḳhud ko ā.īne meñ har sub.h

utārā kartī

Dar ke tanhā.ī se har ik ko

pukārā kartī

sar kabhī dar

kabhī dīvār pe maarā kartī

muskurātī jo kabhī

hoñT sikuḌ jaate the

zard ruḳhsār pe

gaDDhe ka.ī paḌ jaate the

zard chehre pe thin

sharminda gulabi lahren

aankh mayus thi

barson se nahin soi thi

koi aata tha

koi aa ke chala jata tha

koi aadab

naman kar jata tha

phenkta phul tha

patthar koi

kankar koi

siTiyan koi bajata tha

guzar jata tha

gungunata koi

rahon mein Thahar jata tha

subh ho jati thi aankhen yun jhapakte us ki

guzri raaton ke ta'aqub mein lapakte us ki

kapkapate hue hathon se

ishaara karti

rahgiron ko kabhi

aankh bhi mara karti

kaTti lab wo kabhi

zulf sanwara karti

leti angDaiyan

wo jism ubhaara karti

ek hi kaam

musalsal wo

dubara karti

'umr is tarh se apni wo

guzara karti

KHud ko aaine mein har subh

utara karti

Dar ke tanhai se har ek ko

pukara karti

sar kabhi dar

kabhi diwar pe mara karti

muskuraati jo kabhi

honT sikuD jate the

zard ruKHsar pe

gaDDhe kai paD jate the