buzdil

dayār-e-barg-e-rā’nā se

guzartā huuñ

to mujh ko ḳhauf aatā hai

dam-e-lams-e-pareshāñ se

sadā-e-dīda-e-tar se

maiñ us ke rang ko ḳhushbū ko us kī naġhmagī ko

hādisan majrūh o vāmāñda na kar Dālūñ

ḳhumār-e-ārzū kī intihā par

maiñ qalam kartā huuñ apnī uñgliyoñ ko

putliyoñ kī bastiyoñ meñ

jagmagāte sab sitāroñ ko bujhātā huuñ

maiñ tā'zīm-e-adā-e-nūr ke hangām meñ

mānūs chehroñ

aur āvāzoñ ke sāhil par

sar-e-mauj-e-farāvāñ

raushnī kā jur.a-e-anjām piitā huuñ

maiñ apne har safar kī āḳhirī qurbat kī manzil huuñ

maiñ buzdil huuñ

dayar-e-barg-e-ra’na se

guzarta hun

to mujh ko KHauf aata hai

dam-e-lams-e-pareshan se

sada-e-dida-e-tar se

main us ke rang ko KHushbu ko us ki naghmagi ko

hadisan majruh o wamanda na kar Dalun

KHumar-e-arzu ki intiha par

main qalam karta hun apni ungliyon ko

putliyon ki bastiyon mein

jagmagate sab sitaron ko bujhata hun

main ta'zim-e-ada-e-nur ke hangam mein

manus chehron

aur aawazon ke sahil par

sar-e-mauj-e-farawan

raushni ka jura-e-anjam pita hun

main apne har safar ki aaKHiri qurbat ki manzil hun

main buzdil hun