camera

maiñ ne tasvīr-kashī kar ke javāñ kī aulād

un ke bachpan kī tasāvīr nahīñ khīñch sakā

'umair' najmī

ḳhafā thā vaqt mujh se jab se maiñ ye camera laayā

kahāñ manzūr hotā hai samay ko qaid honā

aur merī himmat

ki maiñ tasvīr le kar us ke lamhoñ kī

sajā.ūñ album par album apnī

phir un ko man kare jab jab

uThā kar dekh luuñ tab tab

aur aisā kar ke phir jī luuñ maiñ jitnī baar chāhe guzre lamhoñ ko

ye kyā be-hūdgī kyā bad-tamīzī hai

ye lamhe kyā parinde haiñ jinheñ piñjroñ meñ Daalā jaa.e

yā vahshī jānvar jin ko pakaḌ kar zō meñ rakkhā jaa.e

ki koī apnī marzī se inheñ jab chāhe tab dekhe

maze letā rahe in ke

samay shak kī nigāhoñ se mujhe tab se hī taktā aayā thā

jab se uThāyā painT brush hāthoñ meñ pahlī martaba maiñ ne

magar tab kam-hunar hone ke kāran bach gayā thā maiñ

ki jitnī marzī koshish kartā par

manzar utartā hī na mujh se canvas par ek bhī

to lamha bach kar bhaag jaatā thā

magar phir raushnī ke saath sāzish kī jo maiñ ne

aur kiyā ījād ye piñjra jise ham camera kahte haiñ

tab se koī lamha bach nahīñ paayā

shikāyat kī

paloñ ne bhī phir āqāoñ se apne

aur utrā shaap mujh par āsmānoñ se

ki jaise indr ko abhīshāp ik sādhū kā lag jaa.e

na jī pā.ūñgā maiñ vo pal jise tasvīr meñ laatā huuñ

yā to camere meñ qaid kar saktā huuñ pal ko maiñ

yā ḳhud jī saktā huuñ us ko

magar donoñ nahīñ mumkin

aur itnā hī nahīñ tasvīr ko bhī dekhūñ maiñ jab jab

mujhe mahsūs ho siine meñ tab tab

ik ḳhalish

us lamhe ke vāpas na aane kī tapish meñ dil jale merā

to ab jumbish sī hotī hai mire hāthoñ meñ

jab bhī sochtā huuñ khīñch luuñ tasvīr dhyān aa jaatā hai us shaap kā

to 'ain mumkin hai

guzar jaa.e mirī aulād kā bachpan aur us kī ho na mere paas ik tasvīr bhī

aisā huā to jaan lenā

maiñ ne un lamhoñ ko jiinā chāhā un ko camere meñ qaid karne kī jagah 'fānī'

main ne taswir-kashi kar ke jawan ki aulad

un ke bachpan ki tasawir nahin khinch saka

'umair' najmi

KHafa tha waqt mujh se jab se main ye camera laya

kahan manzur hota hai samay ko qaid hona

aur meri himmat

ki main taswir le kar us ke lamhon ki

sajaun album par album apni

phir un ko man kare jab jab

uTha kar dekh lun tab tab

aur aisa kar ke phir ji lun main jitni bar chahe guzre lamhon ko

ye kya be-hudgi kya bad-tamizi hai

ye lamhe kya parinde hain jinhen pinjron mein Dala jae

ya wahshi jaanwar jin ko pakaD kar zoo mein rakkha jae

ki koi apni marzi se inhen jab chahe tab dekhe

maze leta rahe in ke

samay shak ki nigahon se mujhe tab se hi takta aaya tha

jab se uThaya painT brush hathon mein pahli martaba main ne

magar tab kam-hunar hone ke karan bach gaya tha main

ki jitni marzi koshish karta par

manzar utarta hi na mujh se canwas par ek bhi

to lamha bach kar bhag jata tha

magar phir raushni ke sath sazish ki jo main ne

aur kiya ijad ye pinjra jise hum camera kahte hain

tab se koi lamha bach nahin paya

shikayat ki

palon ne bhi phir aaqaon se apne

aur utra shap mujh par aasmanon se

ki jaise indr ko abhishap ek sadhu ka lag jae

na ji paunga main wo pal jise taswir mein lata hun

ya to camere mein qaid kar sakta hun pal ko main

ya KHud ji sakta hun us ko

magar donon nahin mumkin

aur itna hi nahin taswir ko bhi dekhun main jab jab

mujhe mahsus ho sine mein tab tab

ek KHalish

us lamhe ke wapas na aane ki tapish mein dil jale mera

to ab jumbish si hoti hai mere hathon mein

jab bhi sochta hun khinch lun taswir dhyan aa jata hai us shap ka

to 'ain mumkin hai

guzar jae meri aulad ka bachpan aur us ki ho na mere pas ek taswir bhi

aisa hua to jaan lena

main ne un lamhon ko jina chaha un ko camere mein qaid karne ki jagah 'fani'