chahat ki pahli barish

vo jiine kī pahlī ḳhvāhish

vo chāhat kī pahlī bārish

jis meñ ham donoñ bhīge the

āñkhoñ se dil tak giile the

rone meñ maza aatā thā bahut

khone meñ maza aatā thā bahut

qisse lambe the rātoñ se

jī bhartā kab thā bātoñ se

mausam pe javānī hotī thī

har shaam suhānī hotī thī

ham thaam ke bāñheñ bāñhoñ meñ

nikle the vafā kī rāhoñ meñ

ik moḌ pe donoñ bichhḌe the

armān bhare dil ujḌe the

dil lekin yaad to kartā hai

ro kar fariyād to kartā hai

ai miit purāne aa jaao

vo din duhrāne aa jaao

wo jine ki pahli KHwahish

wo chahat ki pahli barish

jis mein hum donon bhige the

aankhon se dil tak gile the

rone mein maza aata tha bahut

khone mein maza aata tha bahut

qisse lambe the raaton se

ji bharta kab tha baaton se

mausam pe jawani hoti thi

har sham suhani hoti thi

hum tham ke banhen banhon mein

nikle the wafa ki rahon mein

ek moD pe donon bichhDe the

arman bhare dil ujDe the

dil lekin yaad to karta hai

ro kar fariyaad to karta hai

ai mit purane aa jao

wo din duhrane aa jao