chand aaj ki raat nahin nikla

chāñd aaj kī raat nahīñ niklā

vo apne lihāfoñ ke andar chehre ko chhupā.e baiThā hai

vo aaj kī raat na niklegā

ye raat balā kī kālī-rāt

taare use jā ke bulā.eñge

sahrā use āvāzeñ degā

bahr aur pahāḌ pukāreñge

lekin us niiñd ke maate par kuchh aisā niiñd kā jaadū hai

vo aaj kī raat na niklegā

ye raat balā kī kālī-rāt

maġhrib kī havā.eñ chīḳheñgī bahr apnā raag alāpegā

saa.eñ saa.eñ

tārīkī meñ chupke chupke sunsān bhayānak rete par

baḌhtā baḌhtā hī jā.egā

maujoñ kī musalsal yūrish meñ

vo giit barābar gaate hue

jo koī nahīñ ab tak samjhā

sabze meñ huī kuchh jumbish sī

vo kāñpā

aaheñ bharne lagā

chāñd aaj kī raat nahīñ niklā

bheḌeñ sar nīche Daale hue

chup-chāp āñkhoñ ko band kiye

maidāñ kī udaas ḳhamoshī meñ fitrat kī khulī chhat ke nīche

kyuuñ sahmī sahmī phirtī haiñ

aur bāham simTī jaatī haiñ

chāñd aaj kī raat nahīñ niklā

chāñd aaj kī raat na niklegā

chand aaj ki raat nahin nikla

wo apne lihafon ke andar chehre ko chhupae baiTha hai

wo aaj ki raat na niklega

ye raat bala ki kali-raat

tare use ja ke bulaenge

sahra use aawazen dega

bahr aur pahaD pukarenge

lekin us nind ke mate par kuchh aisa nind ka jadu hai

wo aaj ki raat na niklega

ye raat bala ki kali-raat

maghrib ki hawaen chiKHengi bahr apna rag alapega

saen saen

tariki mein chupke chupke sunsan bhayanak rete par

baDhta baDhta hi jaega

maujon ki musalsal yurish mein

wo git barabar gate hue

jo koi nahin ab tak samjha

sabze mein hui kuchh jumbish si

wo kanpa

aahen bharne laga

chand aaj ki raat nahin nikla

bheDen sar niche Dale hue

chup-chap aankhon ko band kiye

maidan ki udas KHamoshi mein fitrat ki khuli chhat ke niche

kyun sahmi sahmi phirti hain

aur baham simTi jati hain

chand aaj ki raat nahin nikla

chand aaj ki raat na niklega