chand

karoḌoñ saal se tū dekhtā hai duniyā ko

zamīñ ke bahr-o-bayābāñ ko dasht-o-dariyā ko

ye daur-e-shām-o-sahar vaqt kā ye paimāna

ye inqalāb-e-bahār-o-ḳhizāñ kā afsāna

ye sāz-e-dahr tirī anjuman kā ik naġhma

navā-e-bazm-e-bashar is chaman kā ik naġhma

numūd-e-ma.adan-o-ārā.ish-e-nabāt huī

tirī hī āñkhoñ ke aage javāñ hayāt huī

inhī shuāoñ se chamkā hai sīna-e-ālam

huā hai matla-e-anvār dīda-e-ādam

tire huzūr dhaḌaktā hai dil samundar kā

damakne lagtā hai chehra fazā-e-bartar kā

vo rah-ravān-e-adam qāfile vo hastī ke

guzarne vaale musāfir zamīñ kī bastī ke

samā.e āñkhoñ meñ āñkhoñ se phir nihāñ bhī hue

vo kārvāñ sifat-e-gard-e-kārvāñ bhī hue

magar tū bazm-e-falak meñ yūñhī daraḳhshāñ hai

ye terī mash.al-e-tābāñ hamesha tābāñ hai

tirī nigāhoñ meñ rang-e-azal jhalaktā hai

abad kā jaam tire haath meñ chhalaktā hai

kabhī hilāl kabhī sūrat-e-mah-e-kāmil

hai tere rāste meñ irtiqā kī har manzil

mushābah haal se tere hai haal qaumoñ kā

uruuj qaumoñ kā yā phir zavāl qaumoñ kā

ye zindagī bhī hai goyā ki raushnī terī

nazar se chhuptī hai lekin kabhī nahīñ bujhtī

agarche partav-e-ḳhurshīd se hai nuur tirā

hai qarz daam kā jām-e-mai-e-surūr tirā

bulandiyoñ meñ bhī terā koī maqām nahīñ

nujūm-e-charḳh-e-barīñ kā tū ham-ḳhirām nahīñ

zamīñ ke pahlū meñ tū ne magar jagah paa.ī

luTā ke daulat-e-husn-o-matā.a-e-ra.anā.ī

karoDon sal se tu dekhta hai duniya ko

zamin ke bahr-o-bayaban ko dasht-o-dariya ko

ye daur-e-sham-o-sahar waqt ka ye paimana

ye inqalab-e-bahaar-o-KHizan ka afsana

ye saz-e-dahr teri anjuman ka ek naghma

nawa-e-bazm-e-bashar is chaman ka ek naghma

numud-e-madan-o-araish-e-nabaat hui

teri hi aankhon ke aage jawan hayat hui

inhi shuaon se chamka hai sina-e-alam

hua hai matla-e-anwar dida-e-adam

tere huzur dhaDakta hai dil samundar ka

damakne lagta hai chehra faza-e-bartar ka

wo rah-rawan-e-adam qafile wo hasti ke

guzarne wale musafir zamin ki basti ke

samae aankhon mein aankhon se phir nihan bhi hue

wo karwan sifat-e-gard-e-karwan bhi hue

magar tu bazm-e-falak mein yunhi daraKHshan hai

ye teri mashal-e-taban hamesha taban hai

teri nigahon mein rang-e-azal jhalakta hai

abad ka jam tere hath mein chhalakta hai

kabhi hilal kabhi surat-e-mah-e-kaamil

hai tere raste mein irtiqa ki har manzil

mushabah haal se tere hai haal qaumon ka

uruj qaumon ka ya phir zawal qaumon ka

ye zindagi bhi hai goya ki raushni teri

nazar se chhupti hai lekin kabhi nahin bujhti

agarche partaw-e-KHurshid se hai nur tera

hai qarz dam ka jam-e-mai-e-surur tera

bulandiyon mein bhi tera koi maqam nahin

nujum-e-charKH-e-barin ka tu ham-KHiram nahin

zamin ke pahlu mein tu ne magar jagah pai

luTa ke daulat-e-husn-o-mataa-e-ranai