chand ki fariyaad

chāñd ne mujh se kahā ai shā.er-e-fikr-e-azal

mere baare meñ bhī likh de koī sanjīda ġhazal

har ta.alluq toḌ rakkhā hai hilāl-e-īd se

tujh ko fursat hī nahīñ hai mah-vashoñ kī diid se

rasm-e-dīdār-e-hilāl-e-īd, afsāna huī

baam par us dam chaḌhe, jis vaqt farzāna huī

le ke nazrāna kametī ne ujālā hai mujhe

gar nahīñ niklā, zabardastī nikālā hai mujhe

meñ jo be-marzī nikal aayā to DāñTā hai bahut

maulvī ne muḳhtalif ḳhānoñ meñ bāñTā hai bahut

is ko mat follow karo, is kī tarīqat maañd hai

tum bareilly ke ho aur ye deobandi chāñd hai

ye jo ḳhūñ-ālūd hai, afġhāniyoñ kā chāñd hai

muḳhtalif TukḌoñ meñ pakistaniyoñ kā chāñd hai

ik karachi se hai niklā ik pas-e-lahore hai

sindh kā chāñd aur hai punjab kā chāñd aur hai

vo jo ham-sā.e kī biivī hai ġhazālā chāñd hai

aur us ke saath jo rahtā hai kaalā chāñd hai

shā.eroñ ne apne sheroñ meñ bahut pelā mujhe

'mīr' o 'ġhālib' ne bhī samjhā ḳhaak kā Dhelā mujhe

sher meñ, rashk-e-qamar lailā ko farmāne lage

tube-light ko hilāl-e-īd batlāne lage

apnī biivī se kahā untīsvīñ kā chāñd ho

aur paḌosan se kahā tum chaudhvīñ kā chāñd ho

aam sī aurat ko mah-pāra banā kar rakh diyā

chāñd ko TuuTā huā taara banā kar rakh diyā

chāñd par jis din se insāñ ke qadam paḌne lage

chāñdnī jin se ho aaise balb kam paḌne lage

maiñ zamīñ se duur huuñ lekin bahut nazdīk huuñ

ai zamīñ vaalo maiñ tum se duur rah kar Thiik huuñ

maiñ zamīñ par aa gayā to har bashar le jā.egā

sab se pahle ten-parsenT apne ghar le jā.egā

chand ne mujh se kaha ai shaer-e-fikr-e-azal

mere bare mein bhi likh de koi sanjida ghazal

har talluq toD rakkha hai hilal-e-id se

tujh ko fursat hi nahin hai mah-washon ki did se

rasm-e-didar-e-hilal-e-id, afsana hui

baam par us dam chaDhe, jis waqt farzana hui

le ke nazrana kameti ne ujala hai mujhe

gar nahin nikla, zabardasti nikala hai mujhe

mein jo be-marzi nikal aaya to DanTa hai bahut

maulwi ne muKHtalif KHanon mein banTa hai bahut

is ko mat follow karo, is ki tariqat mand hai

tum bareilly ke ho aur ye deobandi chand hai

ye jo KHun-alud hai, afghaniyon ka chand hai

muKHtalif TukDon mein pakistaniyon ka chand hai

ek karachi se hai nikla ek pas-e-lahore hai

sindh ka chand aur hai punjab ka chand aur hai

wo jo ham-sae ki biwi hai ghazala chand hai

aur us ke sath jo rahta hai kala chand hai

shaeron ne apne sheron mein bahut pela mujhe

'mir' o 'ghaalib' ne bhi samjha KHak ka Dhela mujhe

sher mein, rashk-e-qamar laila ko farmane lage

tube-light ko hilal-e-id batlane lage

apni biwi se kaha untiswin ka chand ho

aur paDosan se kaha tum chaudhwin ka chand ho

aam si aurat ko mah-para bana kar rakh diya

chand ko TuTa hua tara bana kar rakh diya

chand par jis din se insan ke qadam paDne lage

chandni jin se ho aaise balb kam paDne lage

main zamin se dur hun lekin bahut nazdik hun

ai zamin walo main tum se dur rah kar Thik hun

main zamin par aa gaya to har bashar le jaega

sab se pahle ten-parsenT apne ghar le jaega