chaar fitne

tiin fitnoñ kā qissa purānā huā

chaar fitnoñ kā suniye zarā mājrā

ek lambe haiñ aalim bhī fāzil bhī haiñ

sach to ye hai ki thoḌe se kāhil bhī haiñ

sher kā shauq bhī ilm kā zauq bhī

aur gale meñ aligarh kā hai tauq bhī

murġh-o-māhī kī rag rag se ye āshnā

dostoñ par fidā aur ghar se judā

khāne piine kā koī nahīñ hai nizām

tiir tikke pe chaltā hai sab in kā kaam

dūsrī jo haiñ paḌhne meñ go tez haiñ

un ko dekho to bilkul hī añgrez haiñ

raas aayā hai likhne kā chakkar unheñ

milte rahte haiñ in.aam aksar unheñ

haiñ nafāst-pasnd aur ḳhalvat-pasand

dostī meñ bhī rahtī haiñ kuchh band band

boltī haiñ to lafzoñ kā ġhā.eb sirā

jumla un kā adhūrā hī palle paḌā

tīsrī tez hai aur har fan meñ taaq

har ghaḌī dil-lagī qahqahe aur mazāq

paḌhtī likhtī bhī hai aur gaatī bhī hai

apnī bātoñ se sab ko lubhātī bhī hai

vahm ye hai ki haiñ daañt mere baḌe

mujh se pūchho to lagte haiñ motī jaḌe

sub.h ko roz aḳhbār paḌhtī hai ye

bhaa.ī bahnoñ se phir jā ke laḌtī hai ye

aur chhoTī hai guḌiyā sī ma.asūm sī

kuchh to sanjīda sī thoḌī maġhmūm sī

shart ammāñ se kahiye kahānī na.ī

ek apnī sī laḌkī se hai dostī

ghar sajāne kā us ko baḌā shauq hai

film kā aur gaane kā bhī zauq hai

sab se milne kī zahmat uThātī nahīñ

aire-ġhaire ko ḳhātir meñ laatī nahīñ

chaar phūloñ se gulshan meñ apne bahār

chaar phūloñ pe saarī bahāreñ nisār

chaar fitne nahīñ haiñ ye haiñ chaar yaar

in se apne ufuq ko lage chaar chāñd

in kī kirnoñ se jag meñ ujālā rahe

in kā har bazm meñ bol-bālā rahe

tin fitnon ka qissa purana hua

chaar fitnon ka suniye zara majra

ek lambe hain aalim bhi fazil bhi hain

sach to ye hai ki thoDe se kahil bhi hain

sher ka shauq bhi ilm ka zauq bhi

aur gale mein aligarh ka hai tauq bhi

murgh-o-mahi ki rag rag se ye aashna

doston par fida aur ghar se juda

khane pine ka koi nahin hai nizam

tir tikke pe chalta hai sab in ka kaam

dusri jo hain paDhne mein go tez hain

un ko dekho to bilkul hi angrez hain

ras aaya hai likhne ka chakkar unhen

milte rahte hain inam aksar unhen

hain nafast-pasnd aur KHalwat-pasand

dosti mein bhi rahti hain kuchh band band

bolti hain to lafzon ka ghaeb sira

jumla un ka adhura hi palle paDa

tisri tez hai aur har fan mein taq

har ghaDi dil-lagi qahqahe aur mazaq

paDhti likhti bhi hai aur gati bhi hai

apni baaton se sab ko lubhati bhi hai

wahm ye hai ki hain dant mere baDe

mujh se puchho to lagte hain moti jaDe

subh ko roz aKHbar paDhti hai ye

bhai bahnon se phir ja ke laDti hai ye

aur chhoTi hai guDiya si masum si

kuchh to sanjida si thoDi maghmum si

shart amman se kahiye kahani nai

ek apni si laDki se hai dosti

ghar sajaane ka us ko baDa shauq hai

film ka aur gane ka bhi zauq hai

sab se milne ki zahmat uThati nahin

aire-ghaire ko KHatir mein lati nahin

chaar phulon se gulshan mein apne bahaar

chaar phulon pe sari bahaaren nisar

chaar fitne nahin hain ye hain chaar yar

in se apne ufuq ko lage chaar chand

in ki kirnon se jag mein ujala rahe

in ka har bazm mein bol-baala rahe