chashm-e-tar

ghaTā chhā.ī hai sāvan kī jhaḌī hai

dil-e-maġhmūm kī khetī harī hai

chhalak uTThā hai paimāna nazar kā

buḳhār-e-dil kī āshufta-sarī hai

ruḳh-e-mahtāb par tāroñ ke haale

ye taare haiñ ki motī kī laḌī hai

ujāle ke liye sham-e-farozāñ

añdhere meñ sar-e-mizhgāñ dharī hai

gul-e-nargis pe haiñ shabnam ke qatre

ki siipī hai jo motī se bharī hai

umañD aayā hai dariyā jazb-e-dil kā

bhañvar meñ sabr kī kashtī paḌī hai

'jamīl' ash.ār meñ gauhar-fishānī

ye chashm-e-tar kī sab jādū-garī hai

ghaTa chhai hai sawan ki jhaDi hai

dil-e-maghmum ki kheti hari hai

chhalak uTTha hai paimana nazar ka

buKHar-e-dil ki aashufta-sari hai

ruKH-e-mahtab par taron ke haale

ye tare hain ki moti ki laDi hai

ujale ke liye sham-e-farozan

andhere mein sar-e-mizhgan dhari hai

gul-e-nargis pe hain shabnam ke qatre

ki sipi hai jo moti se bhari hai

umanD aaya hai dariya jazb-e-dil ka

bhanwar mein sabr ki kashti paDi hai

'jamil' ashaar mein gauhar-fishani

ye chashm-e-tar ki sab jadu-gari hai