commercial street ki ek sham

huā hai qatl abhī āftāb-e-mashriq kā

bikhar ga.ī hai har ik samt ḳhuun kī surḳhī

ye rahguzār ki bahtā hai nuur kā dariyā

gudāz jism se uḌtī haiñ bhīnī ḳhushbūeñ

na.ī tarāsh ke malbūs meñ hasīñ joḌe

chamaktī caroñ se aa aa ke yuuñ utarte haiñ

navāzte hoñ qadam rakh ke jaise dhartī ko

har ek dil meñ uchhaltā hai aarzū kā lahū

Thahar gayā hai subuk-gām kārvān-e-hayāt

paḌī hai paañv meñ zanjīr dil-farebī kī

talāsh-e-husn-o-mudāvā-e-zaḳhm-e-dil ke liye

churā ke laa.e haiñ do-chār lamhe duniyā se

yahāñ to koī nahīñ ranj-o-ġham meñ ālūda

har ek chehra to phūloñ kī tarh taaza hai

maiñ muskurā ke galī se nikal na paayā thā

mire zamīr ne chupke se ye kahā mujh se

isī galī meñ kahīñ kho gayā huuñ maiñ DhūñDo

hua hai qatl abhi aaftab-e-mashriq ka

bikhar gai hai har ek samt KHun ki surKHi

ye rahguzar ki bahta hai nur ka dariya

gudaz jism se uDti hain bhini KHushbuen

nai tarash ke malbus mein hasin joDe

chamakti caron se aa aa ke yun utarte hain

nawazte hon qadam rakh ke jaise dharti ko

har ek dil mein uchhalta hai aarzu ka lahu

Thahar gaya hai subuk-gam karwan-e-hayat

paDi hai panw mein zanjir dil-farebi ki

talash-e-husn-o-mudawa-e-zaKHm-e-dil ke liye

chura ke lae hain do-chaar lamhe duniya se

yahan to koi nahin ranj-o-gham mein aaluda

har ek chehra to phulon ki tarh taza hai

main muskura ke gali se nikal na paya tha

mere zamir ne chupke se ye kaha mujh se

isi gali mein kahin kho gaya hun main DhunDo