bad-hali ki KHud-nawisht

merī paidā.ish par

qarz-ḳhvāhoñ ne jashn manāyā

mujhe

pī l 480 ke dāna-e-gandum se baptisma diyā gayā

aur

imdād meñ milne vaale ḳhushk duudh se merī parvarish kī ga.ī

mujhe

polio kī ja.alī qatre pilā.e ga.e

aur

kāñdhe par jāñ-nashīnī kī chādar Daal kar

mujhe

būḌhe vāldain aur chhoTe bahan bhā.iyoñ kā kafīl muqarrar kiyā gayā

ab

maiñ world bank kā mahbūb

aur

aa.ī m ef kā shahzāda huuñ

asian Development bank

merī dastār-bandī ke liye betāb hai

u s aiD vaale

mujhe apnā rozī-rasāñ samajhte haiñ

maiñ maqrūz paidā huā thā

aur maqrūz hī marūñgā

merī duty

ab faqat chhe saat maqrūz paidā karnā

taaki

is sārif ma.āshre meñ apnā tashaḳhḳhus barqarār rakh sakūñ

mujhe

an-paḌh hone kī sanad-e-imtiyāz atā kī ga.ī

taaki maiñ

apne huqūq kī yād-dāsht tahrīr na kar sakūñ

mujhe

intiḳhābāt ke din chhuTTī bhī na dī ga.ī

taaki

maiñ

apnā vote apnī taqdīr ke haq meñ na Daal sakūñ

meri paidaish par

qarz-KHwahon ne jashn manaya

mujhe

pi l 480 ke dana-e-gandum se baptisma diya gaya

aur

imdad mein milne wale KHushk dudh se meri parwarish ki gai

mujhe

polio ki jali qatre pilae gae

aur

kandhe par jaan-nashini ki chadar Dal kar

mujhe

buDhe waldain aur chhoTe bahan bhaiyon ka kafil muqarrar kiya gaya

ab

main world bank ka mahbub

aur

aai m ef ka shahzada hun

asian Dewelopment bank

meri dastar-bandi ke liye betab hai

u s aiD wale

mujhe apna rozi-rasan samajhte hain

main maqruz paida hua tha

aur maqruz hi marunga

meri duty

ab faqat chhe sat maqruz paida karna

taki

is sarif maashre mein apna tashaKHKHus barqarar rakh sakun

mujhe

an-paDh hone ki sanad-e-imtiyaz ata ki gai

taki main

apne huquq ki yaad-dasht tahrir na kar sakun

mujhe

intiKHabaat ke din chhuTTi bhi na di gai

taki

main

apna wote apni taqdir ke haq mein na Dal sakun