dadi-amman ki theory

dādī-ammāñ kahtī haiñ

saarī duniyā gaa.e ke siiñg par Tikī hai

jab ye gaa.e duniyā ko

ek siiñg par uThā.e uThā.e

thak jaatī hai

to use dūsre siiñg par rakh letī hai

idhar se udhar hone par

gaa.e ke ek siiñg se dūsre siiñg tak aate aate

zarā uupar ko duniyā

hil kar rah jaatī hai

dādī-ammāñ kī theory ke mutābiq

karāchī bhī isī duniyā meñ

sīñgoñ par kahīñ vaaqe hai

pichhle kuchh dinoñ se

ye gaa.e kuchh thakī thakī rahne lagī hai

aur duniyā ko jaldī jaldī

sīñgoñ par idhar udhar kartī rahtī hai

lekin ye baat samajh meñ nahīñ aatī

aur dādī-ammāñ kī tarah

hameñ bhī pareshān kartī hai

ki ab

jab gaa.e duniyā ko ek siiñg se badal kar

dūsre siiñg par letī hai

to hamārā karāchī hī

sab se ziyāda kyuuñ hiltā hai

dadi-amman kahti hain

sari duniya gae ke sing par Tiki hai

jab ye gae duniya ko

ek sing par uThae uThae

thak jati hai

to use dusre sing par rakh leti hai

idhar se udhar hone par

gae ke ek sing se dusre sing tak aate aate

zara upar ko duniya

hil kar rah jati hai

dadi-amman ki theory ke mutabiq

karachi bhi isi duniya mein

singon par kahin waqe hai

pichhle kuchh dinon se

ye gae kuchh thaki thaki rahne lagi hai

aur duniya ko jaldi jaldi

singon par idhar udhar karti rahti hai

lekin ye baat samajh mein nahin aati

aur dadi-amman ki tarah

hamein bhi pareshan karti hai

ki ab

jab gae duniya ko ek sing se badal kar

dusre sing par leti hai

to hamara karachi hi

sab se ziyaada kyun hilta hai