daman-darida miras

be-nām āvāra paudoñ

āzurda ashjār

bahmanī tājdāroñ ke abadī masākin se mulhaq

nauha-kunāñ pattharoñ kī ye chhoTī sī bastī

abābīleñ jis kī muhāfiz

dil-shikasta diloñ dil-girafta shaboñ ke gulū-gīr lamhe jis ke ham-rāz

tū jahāñ tiis battīs barsoñ se rahtī chalī aa rahī hai

kyā vāqa'ī is qadar pur-sukūñ to yahāñ hai

maiñ tirī kokh kī fasl kā ek paudā

terī shafqat kā jharnā kahāñ hai

taaj katba kā sar pe uThā.e hue

tū bhī kam kyā kisī tājvar se hai maañ

mere dāman ko lekin zarā dekh le

mujh se anfās kā le hisāb

zindagī kī laḌā.ī meñ nusrat milī kin maqāmāt par

aur kahāñ maiñ ne paa.ī shikast

kis nafas zulmatoñ ke paḌāv mile

kis nafas chāhatoñ ko nadāmat milī

kis nafas ḳhvāhishoñ ke janāze uThe

kis nafas dil jalā

kis nafas mere jazboñ kī mīrās gum ho ga.ī

mere ehsās kī ek ik pankhuḌī

kis nafas bik ga.ī

nīm-shab kī ḳhamoshī ke jangal meñ merī navā ke parind

aaj pahlī dafa

tere maskan kī bojhal fazāoñ meñ mazrūb uḌte haiñ

un kā darmāñ samā'at tirī ho to ho

maiñ to dāman-darīda tahī-dast huuñ

be-nam aawara paudon

aazurda ashjar

bahmani tajdaron ke abadi masakin se mulhaq

nauha-kunan pattharon ki ye chhoTi si basti

ababilen jis ki muhafiz

dil-shikasta dilon dil-girafta shabon ke gulu-gir lamhe jis ke ham-raaz

tu jahan tis battis barson se rahti chali aa rahi hai

kya waqa'i is qadar pur-sukun to yahan hai

main teri kokh ki fasl ka ek pauda

teri shafqat ka jharna kahan hai

taj katba ka sar pe uThae hue

tu bhi kam kya kisi tajwar se hai man

mere daman ko lekin zara dekh le

mujh se anfas ka le hisab

zindagi ki laDai mein nusrat mili kin maqamat par

aur kahan main ne pai shikast

kis nafas zulmaton ke paDaw mile

kis nafas chahaton ko nadamat mili

kis nafas KHwahishon ke janaze uThe

kis nafas dil jala

kis nafas mere jazbon ki miras gum ho gai

mere ehsas ki ek ek pankhuDi

kis nafas bik gai

nim-shab ki KHamoshi ke jangal mein meri nawa ke parind

aaj pahli dafa

tere maskan ki bojhal fazaon mein mazrub uDte hain

un ka darman sama'at teri ho to ho

main to daman-darida tahi-dast hun