dastan-go

mīr-bāqir-alī

tum ne phir biich meñ dāstāñ rok dī

shāh-e-gul-fām gunjal tilismoñ kī gutthiyoñ ko suljhātā

sarsār jangal ke sho.ala nafas azdahoñ se nimaTtā

bayābān-e-hairat kī be-ant vus.at ko sar kar ke

pahre pe māmūr yak-chashm devoñ kī nazreñ bachā

sabz qile kī ūñchī kagar phāñd kar

mah-jabīñ ke muambar shabistān tak aan pahuñchā hai

aur is taraf haq-o-tāġhūt madd-e-muqābil haiñ

āñkheñ jidhar dekhtī haiñ kulhāḌoñ kī nezoñ kī barchhoñ kī fasleñ khaḌī lahlahātī nazar aa rahī haiñ

jarī sūrmā aamne sāmne hinhināte alif hote ghoḌoñ pe zaanū jamā.e hue muntazir haiñ

abhī tabl par thaap paḌne ko hai

aur idhar shāhzāda tilismī mahal ke hasīñ dūdhiyā burj meñ shāh-zādī ke hajle ke andar

abhī lājvardī chhapar-khaT kā zar-baft parda uThā hī rahā hai

magar mīr-bāqir-alī tum ne phir biich meñ dāstāñ rok dī

rāhdārī munaqqash dar-o-bām sat-rang qālīn billor qindīl favvāra barbat sunātā

jharokoñ pe lahrāte pardoñ kī qaus-e-quzah

memana maysara qalb saaqa jināh

āhanī ḳhuud se jhāñktī murta.ish putliyāñ

razm-gah kī kaḌī dhuup meñ ek sākit pharerā

chhapar-khaT pe soī huī shāh-zādī ke pairoñ pe mehñdī kī beleñ

fasāhat ke dariyā bahāte chale jā rahe ho

balāġhat ke motī luTāte chale jā rahe ho

magar mīr-bāqir-alī dāstāñ-go suno

dāstāñ sunñe vaale to sadiyāñ huiiñ uTh ke jā bhī chuke haiñ

tum apne tilismātī qisse ke pur-pech tāgoñ meñ aise lipaTte ga.e ho

ki tum ko ḳhabar hī nahīñ

sāmne vaalī nukkaḌ pe ik aane kī biscope aa ga.ī hai

mir-baqir-ali

tum ne phir bich mein dastan rok di

shah-e-gul-fam gunjal tilismon ki gutthiyon ko suljhata

sarsar jangal ke shoala nafas azdahon se nimaTta

bayaban-e-hairat ki be-ant wusat ko sar kar ke

pahre pe mamur yak-chashm dewon ki nazren bacha

sabz qile ki unchi kagar phand kar

mah-jabin ke muambar shabistan tak aan pahuncha hai

aur is taraf haq-o-taghut madd-e-muqabil hain

aankhen jidhar dekhti hain kulhaDon ki nezon ki barchhon ki faslen khaDi lahlahati nazar aa rahi hain

jari surma aamne samne hinhinate alif hote ghoDon pe zanu jamae hue muntazir hain

abhi tabl par thap paDne ko hai

aur idhar shahzada tilismi mahal ke hasin dudhiya burj mein shah-zadi ke hajle ke andar

abhi lajwardi chhapar-khaT ka zar-baft parda uTha hi raha hai

magar mir-baqir-ali tum ne phir bich mein dastan rok di

rahdari munaqqash dar-o-baam sat-rang qalin billor qindil fawwara barbat sunata

jharokon pe lahraate pardon ki qaus-e-quzah

memana maysara qalb saqa jinah

aahani KHud se jhankti murtaish putliyan

razm-gah ki kaDi dhup mein ek sakit pharera

chhapar-khaT pe soi hui shah-zadi ke pairon pe mehndi ki belen

fasahat ke dariya bahate chale ja rahe ho

balaghat ke moti luTate chale ja rahe ho

magar mir-baqir-ali dastan-go suno

dastan sunne wale to sadiyan huin uTh ke ja bhi chuke hain

tum apne tilismati qisse ke pur-pech tagon mein aise lipaTte gae ho

ki tum ko KHabar hi nahin

samne wali nukkaD pe ek aane ki biscope aa gai hai